Në mesin e qindra qytetarëve që morën pjesë në protestën e mbajtur në Podujevë në mbështetje të ish-pjesëtarëve të Ushtrisë Çlirimtare të Kosovës, ishte edhe ikona llapjane e muzikws, këngëtari Afrim Muqiqi.
Muqiqi, në fjalën e tij para protestuesve, tha se komuniteti artistik do të vazhdojë të kërkojë drejtësi për ish-pjesëtarët e UÇK-së dhe bëri thirrje për unitet në mbështetje të tyre.
“Në emër të komunitetit artistik, jo veç të komunës sonë, por, gjithë Kosovës, nga vendi i Adem Demaçit dhe Zahir Pajazitit do kërkojmë fuqishëm nga Prokuroria dhe gjykatësit e Hagës që të ndryshojnë atë vendim të pamatur pas asnjë fakt që të dënohet lufta jonë e lavdishme. Nuk do të ketë fuqi që ta ndalë uraganin tonë për luftëtarët tonë të lirisë sepse ata janë fajtor, pse ne sot jemi të lirë. Andaj, do të kërkojmë me ngul nga institucionet tona që të gjejnë rrugë diplomatikë që drejtësia jonë të shkojë në vend. Ata nuk janë vrasës, janë çlirimtarë. Nuk ka kuptim që UCK-së i ka ndihmuar NATO, dhe njëkohësisht të dënohen ushtaret e UCK-së. UCK gjithmonë, nuk ka asnjë kuptim që pavarësinë që kanë shpall këta njerëz në bashkëpunim me shtetet tona mike, të njëjtit të dënohen. Të bashkuar nuk do të ndalemi deri në fitoren tonë, qysh e kemi ftuar luftën, e kemi shpall pavarësinë, e kemi bërë shtetit tonë, kemi formuar ushtrinë tonë. Do të vazhdojmë më tre shkronja të arta, unitet, çlirim dhe krenari, kjo është UCK”, tha Muqiqi.
