Ismet Munishi, nuk e llogarit mbijetesën në Superligë me Dukagjinin, por po e mendon Evropën të cilën e sheh të arritshme me shumë vështirësi.
Në një intervistë për emisionin “Sprint” në Tëvë 1, trajneri prishtinas ka thënë se është i kënaqur me rezultatet e Dukagjinit në stinorin vjeshtor, ndonëse e pranon se kanë mundur të marrin edhe më shumë pikë.
“Synimi i Dukagjinit? Me të thënë të drejtën ne kemi shumë pak gjasa për garat evropiane, por do të luftojmë fuqishëm për garat evropiane, ky është qëllimi jonë”, ka thënë Munishi.
Ai ka thënë se është i kënaqur me ecurinë në vitin e kaluar, por që kanë mundur më shumë.
“Në përgjithësi jam i kënaqur. Kemi mundur edhe më mirë dhe me pak fat kemi mundur të kemi më shumë pikë. Nuk është që nuk kemi pas edhe gabime, i kemi analizuar ato e kemi ditur çka na mungon, do të mundohemi që t’i përmirësojmë këto gabime që i kemi si skuadër dhe të paraqitemi sa më mirë në pranverë.”
Pas 18 ndeshjeve në vjeshtë, Dukagjini zë vendin e shtatë me 21 pikë të mbledhura, ku ka regjistruar 6 fitore, 3 barazime dhe 9 humbje, derisa skuadra është në vlugun e përgatitjeve për pranverën e nxehtë.
Të shtunën, Dukagjini do ta marrë rrugën drejt Turqisë, ku trajneri Munishi do ta kompozoj ekipin e tij për stinorin pranveror, i cili nis në fillim të muajit të ardhshëm.
Sa i përket përforcimeve, Munishi ka folur edhe për sulmuesin e talentuar të Skënderbeut, Etienne Tare, i cili është i biri i ish-sulmuesit të Shqipërisë, Igli Tare. Edhe pse nuk ka dhënë shumë detaje rreth tij, Munishi pret shumë nga Etienne në pranverë.
“E kemi marrë prej Skënderbeut, është qendërsulmues, lojtar shumë i mirë edhe jemi në pritje të disa futbollistëve të tjerë. E kemi marrë edhe një djalë shumë të talentuar brenda kampionatit të Kosovës por që nuk po e përmend emrin e tij, për momentin është vetëm Ettiene, një lojtar që ka luajtur te grupmoshat e reja të Lazios, atje është formuar si lojtar”, ka thënë Munishi.
