Deputeti i Lidhjes Demokratike të Kosovës (LDK), Anton Quni, ka folur për mungesën e deputetëve të këtij subjekti politik gjatë aktiviteteve të së mërkurës në Kuvendin e Kosovës, ku pati përplasje mes deputetëve të partive opozitare, Partisë Demokratike të Kosovës (PDK) dhe Aleancës.
Quni, në një prononcim për media para fillimit të mbledhjes së LDK-së, ka thënë se partia e tij është përmbajtur nga pjesëmarrja në situata ku mund të krijohen incidente.
Sipas tij, LDK-ja bën thirrje për qetësi, maturi dhe racionalitet, duke theksuar se problemet politike duhet të zgjidhen përmes dialogut.
“Në lidhje me pjesëmarrjen e djeshme në Kuvend mund të them se LDK-ja përmbahet nga situatat ku mund të gjenerohen incidente. Ne bëjmë thirrje të jemi sa më të qetë dhe me arsyeshmëri e racionalitet, duke e dëgjuar njëri-tjetrin, t’i zgjidhim disa çështje dhe probleme”, ka deklaruar Quni.
Ndryshe, të mërkurën, përplasjet mes deputetëve përshkallëzuan edhe në shtyrje fizike.
Deputetë të PDK-së dhe Aleancës kërkuan që kryesuesi i seancës konstituive, Avni Dehari, ta thërrasë vazhdimin e saj, pavarësisht se ka kaluar afati kushtetues prej 30 ditës për konstituim.
LVV-ja nga ana tjetër insiston se para vazhdimit të seancës duhet të arrihet një marrëveshje politike.
Gjatë përplasjeve në Kuvend më 12 gusht, deputeti i PDK-së Mërgim Lushtaku e shtyu me duar deputetin e LVV-së Adnan Rrustemin.
Në një rast tjetër, deputetja e Aleancës Albana Bytyqi e shtyu atë të LVV-së Arbërie Nagavcin. Deputetja e PDK-së, Ganimete Musliu, u pa duke hedhur letra dhe ujë.
Në debate u përfshinë edhe të tjerë, si ushtruesja e detyrës së presidentes Albulena Haxhiu, Vlora Çitaku, Donika Gërvalla, Eman Rrahmani e Blerta Deliu./teve1.info./
