Mungesa e vitaminës D kryesisht shkakton probleme me kockat dhe muskujt tanë. Sipas Klinikës Cleveland, vitamina D është një vitaminë thelbësore që trupi ynë e përdor për zhvillimin normal dhe mirëmbajtjen e kockave të shëndetshme. Ajo gjithashtu luan një rol të rëndësishëm në sistemin tonë nervor, muskulo-skeletor dhe imunitar.
Siç shpjegojnë mjekët, ne mund të marrim vitaminë D në mënyra të ndryshme, duke përfshirë ekspozimin në diell, ngrënien e disa ushqimeve që përmbajnë vitaminë D dhe marrjen e suplementeve ushqimsulore. Megjithatë, pavarësisht të gjitha metodave për të marrë këtë vitaminë të rëndësishme, mungesa e saj është ende një problem i zakonshëm në botë.
Pse është kaq e rëndësishme vitamina D?
Vitamina D është një nga vitaminat e shumta që trupi ynë ka nevojë për të qëndruar i shëndetshëm. Ka një rol kyç në ruajtjen e ekuilibrit të kalciumit në gjak dhe kocka dhe në ndërtimin dhe mirëmbajtjen e kockave. Më saktësisht, ne kemi nevojë për të që trupi ynë të përdorë kalciumin dhe fosforin për të ndërtuar kocka dhe për të mbështetur indet e shëndetshme, shkruan Index.hr
Me mungesë kronike të vitaminës D, ulja e përthithjes së kalciumit dhe fosforit në zorrët çon në hipokalcemi, domethënë një nivel të ulët të kalciumit në gjak. Kjo gjendje mund të shkaktojë simptoma të tilla si dobësi e muskujve, ngërçe, lodhje dhe depresion. Mungesa e vitaminës D çon gjithashtu në një rrezik të shtuar të frakturave të kockave, madje disa studime tregojnë se njerëzit me mungesë të vitaminës D kanë një rrezik më të lartë të sulmit në zemër, raporton Klinika Cleveland.
Kush është më i ndjeshëm ndaj mungesës së vitaminës D?
Edhe pse çdokush mund të ketë mungesë të vitaminës D në trup, foshnjat, fëmijët dhe të rriturit mbi 60 vjeç janë më të ndjeshëm ndaj saj. Mungesa e kësaj vitamine të rëndësishme dihet gjithashtu se është më e zakonshme tek njerëzit me përmbajtje të shtuar të melaninës në lëkurë.
