Ministria e Shëndetësisë në Rripin e Gazës ka paralajmëruar se të gjitha spitalet e mbetura funksionale në territor mund të ndalojnë së operuari deri në fund të kësaj jave për shkak të mungesës së rëndë të karburantit.
Në një deklaratë të publikuar mëngjesin e sotëm në Telegram, ministria bëri një apel të fortë për ndërhyrje të menjëhershme për të shmangur një katastrofë humanitare.
“Vetëm pak ditë na ndajnë nga mbyllja e spitaleve për shkak të pakësimit të karburantit në spitale,” thuhet në deklaratë, citon The Guardian.
Ministria theksoi se kriza ka arritur një fazë të rrezikshme dhe se jetët e pacientëve janë në rrezik të madh nëse nuk sigurohen furnizime urgjente.
“Kriza e mungesës së karburantit në spitalet e mbetura operative në Rripin e Gazës ka arritur në një fazë kritike të rrezikshme,” thuhet më tej.
Deklarata paralajmëron se pa ndërhyrje të shpejtë, disa ditë mund të jenë vendimtare për sistemin shëndetësor tashmë të rrënuar:
“Disa ditë mund të sjellin skena të departamenteve jetësore që ndërpresin operacionet, që do të thotë përkeqësim i krizës shëndetësore dhe ekspozim i jetës së pacientëve dhe të plagosurve ndaj vdekjes së sigurt.”
Ministria tha se përpjekjet për të riorganizuar oraret e punës dhe funksionimit teknik të spitaleve tashmë janë të pamjaftueshme:
“Masat teknike dhe inxhinierike për të planifikuar periudhat e operimit janë bërë joefektive me ndërprerjen e furnizimit me karburant.”
Në fund të deklaratës, ministria lëshoi një apel të qartë për ndihmë:
“Ministria e Shëndetësisë përsërit apelin e saj urgjent drejtuar të gjitha palëve të interesuara që të ndërhyjnë për të siguruar përforcimin e rezervave të karburantit në spitale, me qëllim shmangien e një katastrofe me pasoja të paparashikueshme.”
Ndërkohë, situata është përkeqësuar edhe më tej nga goditjet ajrore. Të hënën, ministria njoftoi se dy spitale kanë dalë jashtë shërbimit.
