Nga Forumi Strategjik i Bledit, doli një deklaratë e padëgjuar më parë.
Anëtarësimit të vendeve të Ballkanit iu përmend afati kohor se kur ato mund të bëhen pjesë e Bashkimit Evropian.
Presidenti i Këshillit Evropian, Charles Michel bëri thirrje që viti 2030 të caktohet si afati deri kur Bashkimi Evropian dhe vendet kandidate të jenë të gatshëm për zgjerim.
Skepticizmi për këtë deklaratë u shfaq edhe gjatë diskutimit në Slloveni.
Por, njohësi i çështjeve politike Melazim Koci, në emisionin “Ditari” në tëvë1, tha se kjo gjë mund të ndodh nëse BE e bënë vlerësimin e vendeve në mënyrë selektive.
Ndërsa, profesori i shkencave politike, Dritëro Arifi, thotë se takimet si ky i Bledit në Slloveni nuk mund të prodhojnë diçka konkret.
“Ky samit më shumë e ka formën e një takimi joformal të kryeministrave apo presidentëve të shteteve të Ballkanit Perëndimor dhe të Bashkimit Evropian, ku mund të qartësohen disa opinione dhe problematika të cilat janë gjatë rrugës së politikë-bërjes në vendet e Ballkanit Perëndimor. Pra, është një takim pozitiv, por jo domethënës. Por, unë besoj që më shumë në këto samite, është në nivelin erotik se sa në atë praktik. Pra, në atë praktik janë dy qendra ku kryhen të gjitha punët, është Brukseli dhe Uashingtoni”, tha Arifi.
Procesi i Berlinit është ai i cili ka marrë për sipër përafrimin e vendeve te Ballkanit Perëndimor me Bashkimin Evropian. Sesioni i ardhshëm i këtij samiti, këtë vit mbahet në Tiranë.
