Këshilltari i kryeministrit Albin Kurti, Jeton Zulfaj, ka paralajmëruar se çështja e zgjedhjes së presidentit do të dërgohet në Gjykata Kushtetuese e Kosovës nëse procesi nuk përfundon deri në mesnatën e sotme, që është edhe afati kushtetues.
Në një postim në Facebook, Zulfaj theksoi se mospjesëmarrja e deputetëve në votimet për zgjedhjen e presidentit përbën shkelje të Kushtetutës.
Ai sqaroi se vendi nuk shkon automatikisht në zgjedhje të reja nëse raundi i tretë i votimit dështon për shkak të mungesës së kuorumit prej dy të tretave të deputetëve.
Sipas tij, bazuar në aktgjykimin KO29/11 të Gjykatës Kushtetuese, deputetët janë të obliguar të marrin pjesë në të tria votimet për zgjedhjen e presidentit. Në rast se ata nuk marrin pjesë, kjo konsiderohet shkelje kushtetuese dhe çështja duhet të trajtohet nga Gjykata Kushtetuese.
Ndërkohë, Lëvizja Vetëvendosje ka propozuar Glauk Konjufca si kandidat për president. Nga ana tjetër, presidentja aktuale Vjosa Osmani ka shprehur interesimin për një mandat të dytë, por ende nuk ka arritur të sigurojë nënshkrimet e nevojshme për nominim.
Për zhvillimin e një gare për postin e presidentit kërkohet që të ketë të paktën dy kandidatë.
Zulfaj ka theksuar se Osmani është zgjedhur më herët kryetare e Kuvendit dhe presidente me votat e Vetëvendosjes, por sipas tij kjo nuk do të thotë se partia ka detyrim ta mbështesë përsëri për këtë post.
Ai shtoi se, përveç ish-presidentes Atifete Jahjaga, posti i presidentit në Kosovë zakonisht është mbajtur nga figura me përkatësi partiake, duke përfshirë edhe Osmanin në kohën kur u zgjodh presidente pesë vjet më parë.
Sipas Zulfajt, Osmani sot nuk përfaqëson ndonjë subjekt politik, por nuk mund të konsiderohet figurë konsensuale, pasi karriera e saj politike është ndërtuar brenda partive politike. Megjithatë, ai e cilësoi atë si një figurë të respektuar dhe të denjë për poste të larta shtetërore.
Në fund, Zulfaj kritikoi interpretimin e Gjykatës Kushtetuese lidhur me procedurën e zgjedhjes së presidentit. Sipas tij, Kushtetuta parasheh qartë tri votime dhe në të tretin president zgjidhet me shumicën e votave të të gjithë deputetëve. Ai vlerësoi se barazimi praktik i votimit të tretë me dy të parët, ku kërkohen dy të tretat e votave, e ka ndërlikuar procesin dhe e ka dobësuar mekanizmin që synon të zhbllokojë situatat e tilla politike.
