Drejtori i “PolCon”, Fitim Mulolli, ka komentuar në emisionin “Ditari” në Tëvë1 qëndrimin e kryetarit të Aleancës, Ardian Gjini, i cili nuk e pranoi ftesën e kryeministrit në detyrë, Albin Kurti, për takimin me kryetarët e partive politike.
Sipas Mulollit, vendimi i Gjinit ishte një lëvizje e menduar mirë, pasi, sipas tij, iu përgjigj narrativës që Lëvizja Vetëvendosje ka përdorur ndër vite ndaj partive opozitare.
“Unë mendoj që ishte një pozicionim goxha i mençur edhe taktik i z. Gjini për dy arsye. E para, sepse LVV gjithmonë i ka etiketuar tri partitë se ato vrapojnë vetëm pas pushtetit, vetëm pas pozitave dhe kurrë s’kanë qenë pro parimeve e politikave. Z. Gjini e bëri të kundërtën, e luajti lojën e tyre. U tha: ‘Urdhëroni, këto pika, këto janë prioritetet e mia’. Të gjitha nuk janë asnjëra egoiste, janë në të mirë të shtetit. Ai tha se nuk do asnjë pozitë, vetëm të përmbushen këto pika. Mendoj që është një pozicion i mendueshëm dhe për këtë thuajse nuk pati asnjë reagim nga LVV-ja që ta kundërshtonte, sepse i goditi aty ku vazhdimisht kanë folur dhe promovuar edhe vetë LVV-ja”, ka thënë Mulolli.
Ai shtoi se qëndrimi i Gjinit ishte i pjekur dhe i mirëllogaritur.
“Unë mendoj që është një pozicion i pjekur dhe i mirë menduar nga z. Gjini në këtë rast”, ka përfunduar Mulolli.
