Politikani shqiptar e nënkryetar i Komunës së Wylie në Teksas, Gino Mulliqi, ka reaguar pas vendimit të Shteteve të Bashkuara për ta pezulluar dialogun strategjik me Kosovën.
Mulliqi këtë vendim e cilësoi si një masë që tregon shumë për gjendjen e shtetit dhe politikëbërjen në Kosovë.
“Është një pikë që ndoshta nuk duhet të kishim ardhur deri këtu, është një masë që thotë shumë për shtetin e Kosovës dhe politik bërjen e Kosovës. Na duhet një këndvështrim shumë i gjerë i gjithë spektrit politik në Kosovë se qeveria amerikane në krye me presidentin Trump dhe sekretarin Rubio po e bëjnë një politik të jashtme të ShBA-së në mënyrë më të ndryshme dhe që politikanët tonë duhet t’i kërkojnë qasje shumë të vrullshme dhe të respektueshme ndaj politik bërjes amerikane”, u shpreh Mulliqi në emisionin “Info Nata” në Tëvë1.
Ai tha se përgjegjësinë për situatën e mban i gjithë spektri politik në Kosovë dhe se duhet të ketë reflektim për mënyrën se si po kuptohet dhe trajtohet politika e jashtme amerikane.
“Fajtor jemi që të gjithë dhe duhet që të gjithë të fokusohemi në mënyrën se si politik bërja amerikane po bëhet në politikën e jashtme. Duhet ta dimë që Amerika po punon në mënyrë strategjike dhe Amerika është e para dhe mendoj që çdo vazhdim apo çdo tkurrje e moskrijimit të institucioneve të ndryshimeve jo kryetari, jo zëvendëskryetari: ne duhet ta kemi të qartë që këtu ku jemi sot jemi falë dhjetëra, mijëra dëshmorëve që kanë rënë për këtë vend, dhe falë ShBA-së. Kështu që ne po luftojmë që Amerika ta merr rolin primar në dialogun Kosovë – Serbi”, deklaroi ai.
