I pyetur se a janë të ekzagjeruara deklaratat e Kurtit për rrezik për luftë me Serbinë, Muja në emisionin ResPublika tha se janë disa përvoja paraprake që Kosovën nuk e lejojnë ta ulë nivelin e sigurisë.
“A është ekzagjerim apo është neglizhencë është pak relative, varet se si e mendon sigurinë e përgjithshme të vendit. Janë disa përvoja paraprake që neve nuk na lejojnë me e ulë gardën. E para është të jemi subjekt i spastrimit etnik ku nuk të lejon qoftë edhe nëse probabiliteti është 2 për qind apo 5 për qind nuk bënë të të lë rehat, se duhet të përgatitesh në raste të tilla. Pa marrë parasysh se si rrjedh situata, Kosova duhet të jetë e aftë të kontribuojë në paqen botërore dhe në të njëjtën kohë të jetë e gatshme të ruaj rendin e vet kushtetues dhe kufijtë e saj”, u shpreh ai në emisionin ResPublika me Zijadin Gashi.
Gjithashtu shqetësuese sipas tij mbeten shpenzimet e Serbisë në armatim. Muja më tej tha se rreziku për luftë nuk duhet të nënkuptohet vetëm në aspektin e invazionit ushtarak, por se ekziston rreziku i luftërave hibride.
“E dyta, janë disa zhvillime që ne na shqetësojnë. Psh rritja e 1.2 miliard euro që Serbia e shpenzon në armatim nga Kina dhe Rusia, ushtrimet e tyre të vazhdueshme, 100 baza rreth Kosovës. Për çka bëhen këto? Për dy arsye, unë besoj, e para se këta duan të na i dredhin dy duart neve, apo në njëfarë forme t’i përdorin ati në kuadër të bagazhit të negociomit dhe të sigurojnë favore në kuptimin territorial. Kjo është në rastin më të butë. Apo në rastin më të keq, çka unë e shoh rreziku i luftërave hibride. Të cilat jo domosdoshmërisht e kanë invazionin ushtarak, por mund të manifestohet sikur ata njerëzit e gjelbër në Krime ose grupet kriminale të cilat shkaktojnë jostabilitet ose i parandalojnë institucionet e rendit për të shtrirë autoritetin ose funksionimin e shtetit”, shtoi Muja.
