Ministri në detyrë i Bujqësisë, Armend Muja, ka vizituar sot fermerët e Istogut të prekur nga breshëri, duke premtuar mbështetje për tejkalimin e dëmeve të shkaktuara në kulturat bujqësore.
Gjatë vizitës së përbashkët me kryetarin e Istogut, Muja tha se fillimisht duhet të përfundojnë procedurat për vlerësimin e dëmeve nga komisioni komunal, në mënyrë që raporti të dërgohet për trajtim në institucionet përgjegjëse.
Ai bëri të ditur se Komisioni për Vlerësimin e Dëmeve është themeluar nga komuna dhe kërkoi që procesi i evidentimit të dëmeve të përfundojë sa më shpejt.
“Raporti pasi të kompletohet duhet t’i dërgohet Agjencisë për Menaxhim të Emergjencave, e cila në bazë të Ligjit për Mbrojtje nga Fatkeqësitë Natyrore e adreson më pas tek qeverisja qendrore”, ka deklaruar Muja.
Ministri në detyrë i Bujqësisë tha se bashkë me zyrtarë të ministrisë ka parë nga afër gjendjen në terren dhe se nga java e ardhshme do të propozohen masat konkrete për t’u dalë në ndihmë fermerëve të prekur.
Ai gjithashtu i ka hedhur poshtë pretendimet se fermerët nuk janë kompensuar për dëmet nga fatkeqësitë natyrore, duke përmendur raste të kompensimeve në vitet e kaluara.
Istogu është një nga komunat më të prekura nga breshëri i ditëve të fundit, i cili ka shkaktuar dëme të konsiderueshme në kulturat bujqësore./teve1.info/
