Profesori Basri Muja ka vlerësuar se përplasjet e brendshme në Lidhjen Demokratike të Kosovës (LDK) nuk do t’i sjellin përfitime partisë, duke paralajmëruar se vazhdimi i konflikteve personale mund të çojë në një ndarje të re të subjektit politik.
Në emisionin “Ditari” në Tëvë1, Muja ka thënë se LDK-ja gjendet para një mundësie të rëndësishme për t’i kthyer debatet e brendshme në diskutime programore dhe përmbajtësore.
“Nuk mendoj që LDK-së do t’i ndihmojë kjo ndarje e taboreve pro apo kundër një grupi apo një tjetri. Kjo është edhe një shans i fundit për LDK-në. Nëse arrijnë që këtë debat, i cili është personal, ta kthejnë në përmbajtësor, LDK-ja mund të dalë më e fuqishme, por nëse përplasjet mbesin kryesisht tek persona të caktuar që pretendojnë funksione brenda degëve, atëherë gjasat janë të mëdha që LDK-ja ta pësojë një ndarje të radhës”, ka deklaruar ai.
Sipas Mujës, krahas procesit të zgjedhjeve të brendshme, partia ka nevojë edhe për një reformim të thellë programor dhe organizativ.
“Nuk mjafton të jesh pro ose kundër Lëvizjes Vetëvendosje apo qeverisë së saj. Duhet të ofrosh më shumë dhe të kesh një qartësim të identitetit ideologjik. Po ashtu nevojitet një reformë e brendshme organizative dhe një ndryshim i kulturës së brendshme politike”, ka theksuar ai.
Muja ka komentuar edhe reagimin e kryetarit të LDK-së, Lumir Abdixhiku, ndaj kërkesave për dorëheqje që erdhën nga degët e partisë në Pejë dhe Lipjan pas rezultatit të fundit zgjedhor.
Ai e ka cilësuar reagimin e Abdixhikut si të pamatur, duke vlerësuar se kërkesat e anëtarësisë duhej të trajtoheshin me më shumë mirëkuptim.
“Në vend që degët të flasin për ide dhe programe, ato flasin për persona, dhe kur përmenden emra të veçantë, shohim reagime si ai i Abdixhikut dje, i cili në njëfarë mënyre u soll sikur të kishte ardhur një sulm nga kampet më armiqësore. Unë nuk kam parë një frustrim të tillë për një kërkesë shumë legjitime. Mendoj se ai duhet të dilte dhe thjesht të thoshte: ‘Unë ju kuptoj, e di që keni brenga, pritjet kanë qenë të tjera, dhe natyrisht me një kandidat për president dhe një për kryeministër keni pasur pritje më të mëdha. Këto brenga i kemi edhe ne, dhe le të ulemi t’i diskutojmë e t’i zgjidhim bashkë,’” ka përfunduar Muja.
Ndryshe, në LDK të martën tri degë kërkuan dorëheqjen e kryetarit Lumir Abdixhiku pas rezultatit të zgjedhjeve të 7 qershorit. Abdixhiku refuzoi e u kërkoi kryetarëve të degëve ta bëjnë një gjë të tillë. Madje me akuza për sabotim./teve1.info/
