Profesori universitar, Basri Muja, ka komentuar zhvillimet e fundit politike dhe ndikimin që, sipas tij, kanë pasur në rezultatin zgjedhor të Lidhjes Demokratike të Kosovës .
Duke folur në emisionin “Ditari” në Tëvë1, Muja tha se një nga faktorët që e ka penalizuar LDK-në në zgjedhjet e fundit ka qenë rikthimi i presidentes Vjosa Osmani në parti dhe ndryshimi i qasjes së saj politike ndaj bashkëpunëtorëve të mëparshëm.
“Ajo, kur e mori vesh që nuk do të rikandidohej nga z. Kurti edhe për një mandat si presidente, e ndryshoi qasjen dhe bëri një kërcim politik të pakuptimtë. Kush mund t’i besojë asaj kur del dhe tregon sa i keq ka qenë ai dhe sa në rrezik ka qenë vendi, ndërkohë që ajo ka heshtur? Në fakt, është dashur të kërkohej përgjegjësi prej saj, sepse është dashur të reagonte atëherë”, tha Muja.
Ai e cilësoi si “jo natyror” afrimin e Osmanit me LDK-në, duke kujtuar mënyrën se si ajo ishte larguar nga partia në vitin 2021.
“Ky fuzion ka qenë jo natyror. Ajo është kthyer në parti. Në vitin 2021 e ka lënë partinë në baltë dhe tani kthehet prapë sikur nuk ka ndodhur asgjë. E kemi dëgjuar edhe Hykmete Bajramin në një intervistë kur ka thënë: ‘Çfarë t’u themi tani atyre 112 mijë votuesve që kanë mbetur me ne kur kemi qenë më së keqi? T’u themi se nuk ka ndodhur asgjë?’ Ajo kthehet pas pesë vitesh sikur të mos kishte ndodhur asgjë dhe vendoset në vendin e parë”, u shpreh ai.
Duke folur për zhvillimet brenda Partisë Demokratike të Kosovës (PDK), Muja vlerësoi se afrimi i Fatmir Limajt me këtë subjekt politik nuk do të krijonte përçarje, përkundrazi do të ndihmonte në bashkimin e elektoratit që dikur kishte qenë pjesë e së njëjtës parti.
“Mua më ka bërë përshtypje se si PDK-ja ka dashur që z. Limaj të kthehet aty ku kanë qenë të ndarë dhe tani duhet kohë që kjo të ndodhë. Fatmir Limaj me PDK-në, edhe nëse bashkohen, nuk krijojnë ndarje. Kjo që ka ndodhur tani mund të krijojë ndarje”, deklaroi Muja.
