Deputeti i Vetëvendosjes, Armend Muja ka deklaruar se në këto dy vite e gjysmë të qeverisjes së Vetëvendosjes në Kosovë ka vërejtur që ekonomia është në proces të dyfishimit.
Muja në emisionin “ReSpublika në Tëvë1, theksoi se Qeveria Kurti ka trashëguar një shtet të dobët dhe se me ardhjen e tyre në pushtet janë bazuar në tri orientime të cilat sipas Mujes, janë përmirësimi i standardit jetësor, drejtësia dhe e subjektiviteti ndërkombëtarë.
“Ajo çka unë e di është që ne kemi trashëgu një shtet të dobët edhe kur kemi ardhë ne në pushtet i kemi bazu planet tona tek do të thoja tri orientime kryesore. E para është përmirësimi i standardit tonë jetësorë edhe zhvillimit ekonomik, e dyta është te drejtësia, jo vetën në kuptimin ligjor por edhe social dhe e treta domosdoshmërisht është subjektiviteti ndërkombëtar dhe për pasojë edhe dinjiteti i Kosovës. Ajo çka unë e di është që dy vite e gjysmë pas Qeverisë Kurti, unë vërej shenja që ekonomia jonë është në proces të dyfishimit, parametrat tona ekonomike po shkojnë drejtë dyfishimit”, deklaroi Muja.
Kjo pasi sipas tij, Qeveria Kurti kishte trashëguar një ekonomi në vlerë prej 6.7 miliardë euro, por që sipas Mujes, deri në vitin e ardhshëm ekonomia e vendit do të arrijë dyfishin e asaj çfarë është trashëguar.
“E para e punës është ne kemi trashëgu një ekonomi në vlerë prej 6.7miliardë euro, sivjet mund të shkojë ekonomia jonë rreth 10 miliardë euro, deri në vitin e ardhshëm unë besoj që ekonomia jonë do të jetë dyfishi i asaj çfarë kemi trashëgu ne. Të hyrat tona për kokë banori i kemi marrë diku me 3 mijë e 600 euro dhe unë besoj që deri në fund të vitit të ardhshëm ato do të jenë dyfishi i asaj çfarë kemi trashëgu. E treta e kemi trashëgu një shtet taksambledhës të dobët ku ka mbledhë dikun rreth 1.5 miliardë euro të hyra tatimore dhe unë e di që deri në fund të këtij viti do të shkojë deri në 2.6 miliardë, e deri në fund të vitit të ardhshëm rreth 3 miliardë ,që do të jetë dyfishim i të hyrave tatimore”, shtoi Muja./teve1.info./
