Këtë vlerësim ai e bëri në emisionin “Ditari” në Tëvë1, teksa foli për çështjen e marrëveshjes për targat e automjeteve. Sipas tij, kjo çështje është treguesi më i mirë i kompleksitetit të dialogut Kosovë – Serbi.
“Debatet për targat janë shembulli më i mirë se sa komplekse dhe e veçantë është situata mes Kosovës dhe Serbisë. Nëse për një marrëveshje që do të duhej të ishte teknike dhe lehtë e zgjidhshme ka kaq shumë probleme, atëherë paramendojeni se sa e vështirë do të jetë të arrihet një marrëveshje finale e cila do ta përmbyllte kapitullin e luftërave shekullore mes Kosovës dhe Serbisë”, tha Muhaxhiri.
Ai më tej deklaroi se nëse ndodh që të kthehet në pikë zero marrëveshja për targat mes Kosovës dhe Serbisë, atëherë këtë vit nuk do të ketë më asgjë nga dialogu.
“Nëse arrihet kjo marrëveshje do të jetë e mirë për të gjithë, për Kosovën, Serbinë dhe BE-në, sepse do të jetë një motiv për të ecur përpara. Pra, nëse këto debate përfundojnë në mënyrë të frytshme atëherë do të jetë një imazh i mirë për të gjithë sepse mund të arrihen edhe marrëveshje tjera në dobi të qytetarëve. Ndërsa, nëse kthehemi në pikën zero, do të jetë një shembull që në këtë vit nuk do të ketë asgjë më nga dialogu”, tha tutje Muhaxhiri.
Sipas tij, deri më tani nuk ka pasur ndonjë indikacion pozitiv në dialog. Ndërsa, tha se Kosova është më keq se sa Serbia drejt rrugës për Integrime Evropiane.
“Ky është një shembull më së shumti për BE-në, që problemet mes Kosovës dhe Serbisë janë aq fundamentale saqë nevojiten edhe angazhime edhe presione nga të gjitha palët në mënyrë që të arrihet një sukses. Deri më tani nuk kemi parë ndonjë indikacion pozitiv, dhe kjo është për keqardhje, sepse për fat të keq në rrugën e Integrimeve Evropiane, Kosova është më keq se sa Serbia. Pra Serbia ka hapur kapituj në rrugën drejt anëtarësimit”, u shpreh ai.
