Për herë të fundit para se të shpallej fajtor doli nën pranga dhe u ul në bankën e të akuzuarit.
Por, këtë të premte Muhamet Alidemaj u dënua për krime lufte për pjesëmarrje në masakrën e Izbicës 25 vite më parë.
Gjykata Themelore në Prishtinë, e shpalli fajtor duke i shqiptuar 15 vite burgim.
Gjyqtari Islami ka thënë se pas mbajtjes së shumë shqyrtimeve gjyqësore, administrimit të provave e dëgjimit të dëshmitarëve është vërtetuar se i akuzuari Alidemaj ka qenë pjesë e forcave serbe dhe ka marrë pjesë në masakrën e Izbicës.
Të pakënaqur me këtë vendim të gjykatës janë shprehur viktimat.
Kurse, nga mbrojtja e Alidemajt kanë thënë se do të ankohen në shkallën e dytë.
“Nuk jemi te kënaqur me këtë vendim dëshmitarët i kane dhënë 5 përshkrime te ndryshme për të akuzuarin, do te parashtrojmë ankesë ne shkallën e dytë”, tha avokati i Muhamet Alidemajt, Milos Delevioq.
Aktakuza ndaj Muhamet Alidemajt ishte ngritur në vitin 2022, teksa në procesin gjyqësor ndaj tij janë dëgjuar 21 dëshmitarë.
Alidemaj vazhdimisht kishte mohuar se gjatë kohës luftës ka qenë në Kosovë. Në Izbicë të Skenderajt, në mars të 1999-s, ishin vrarë e masakruar 147 civilë shqiptarë.
