Sipas MSH-së me këtë buxhet do të plotësohet shërbimi i të gjitha nevojave në nivelin parësor, që mos të ketë të mbyllur asnjë Ambulancatë Mjekësisë Familjare në mungesë të mjekëve .
MSH thotë se është buxhetuar edhe punësimi i profesionistëve shëndetësor.
“Ndërsa jemi siguruar që të buxhetohet plotësimi i të gjitha nevojave në nivelin parësor ashtu që të mos ketë më asnjë Ambulancë të Mjekësisë Familjare të mbyllur pse nuk ka mjekë apo Qendër të mjekësisë familjare që nuk ofron shërbime të plota. Ndaj e kemi rritur buxhetin për Grantin Specifik për shëndetësi për kujdesin parësor shëndetësor, duke shtuar edhe 300 pozita të reja për profesionistë shëndetësorë. Në kujdesin dytësor dhe tretësor shëndetësor do të ketë edhe 100 pozita të reja shtesë për profesionistë shëndetësor të cilat duhet të shfrytëzohen për sektorët deficitarë dhe për të plotësuar ato shërbime mjekësore që janë në mungesë për shkak të burimeve njerëzore”, thuhet në komunikatë.
Me buxhetin e vitin 2023 MSH planifikon punësimin edhe të 42 inspektor shëndetësor, si dhe punësimin e profesionistëve të huaj.
MSH thotë se do ketë edhe pajisje të reja, ku spitalet rajonale do të pajisen me laboratorët e patologjisë e citologjisë.
“Ndër pajisjet që do të sigurohen janë akceleratori linear për radioterapi, duke i mbuluar kësilloj nevojat sipas standardeve për numër të banorëve. Do të sigurohen rezonanca magnetike për spitalet e përgjithshme dhe do të kompletohen spitalet rajonale me pajisje për laboratorët e patologjisë e citologjisë”, thuhet tutje në komunikatën e MSH-së.
Përmirësimi shërbimeve kirurgjike me shërbime të reja e cila do të zvogëlonte referimin e rasteve jashtë institucioneve shëndetësore publike është planifikimi tjetër i ministrisë.
Qeveria e Kosovës të premten ka miratuar Projektligjin mbi Ndarjet Buxhetore për Buxhetin e Republikës së Kosovës për vitin 2023. Buxheti për vitin 2023 do të jetë 3 miliardë e 212 milionë euro./teve1.info/
