Sipas MSh-së, ky institucion nuk ka skemë të rimbursimit të terapive, raporton KP.
Me qindra euro kanë shpenzuar qytetarët në Kosovë të infektuar me COVID-19. Medikamentet janë shitur në çmime të ndryshme, ku vetëm Remdesivir-i, është shitur deri në 800 euro.
Ndërkohë, në kohën kur institucionet shëndetësore po përballeshin me vlugun e rasteve të infektimit me Coronavirus, Remdesivir-i nuk ka ekzistuar në tregun e Kosovës.
Anëtari i Komisionit për Shëndetësi, Shemsedin Dreshaj, thotë se në fillim kur është rekomanduar Remdesiviri që të përdoret, ai barë nuk ka ekzistuar në tregun e Kosovës.
“Është dashur të sigurohet me rrugë të ndryshme prej jashtë. Nuk ka qenë as në listën e barnave të cilat ne i kemi në qarkullim në Kosovë, kështu që është siguruar përmes rrugëve të ndryshme. Vërtetë atëherë çmimi ka qenë i lartë dhe është shkuar diku deri në 800 euro. Pastaj dikur ka filluar të bie deri në 75 euro, sa ka qenë herën e fundit”, deklaron Dreshaj.
Dy vjet pas përhapjes së rasteve të para me këtë virus, infektologu Shemsedin Dreshaj kërkon nga Kryetari i Shoqatës për të Drejtat e Pacientëve, Besim Kodra, ka thënë se kanë pasur ankesa që nga fillimi i pandemisë që barnat po shiten me çmime të larta.
“Kemi marrë shuma të ndryshme, dikush nuk ka shpenzuar asgjë, por dikush ka shpenzuar deri në shtatë mijë euro. Dhe kemi nxjerrë një shumë mesatare që na ka dalë se shpenzimi mesatar është 426 euro për secilin pacient të prekur me COVID-19”, tregon Kodra.
Megjithatë, nga Ministria e Shëndetësisë në një përgjigje me shkrim, kanë theksuar se në mungesë të sigurimeve shëndetësore, nuk mund të ketë skemë të rimbursimit të terapive.
“Në mungesë të sigurimeve shëndetësore publike, nuk ka skemë të rimbursimit të terapive, të cilat pacientët i blejnë individualisht. Terapitë për COVID-19, janë siguruar nga MSH dhe SHSKUK, dhe përmes donacioneve, ku çdo terapi i është ofruar pacientëve”, thuhet në këtë përgjigje.