Ministria e Shëndetësisë, në bazë të rekomandimeve të Institutit Kombëtar të Shëndetësisë Publike të Kosovës, rekomandon që institucionet publike dhe private të zbatojnë masa mbrojtëse për mbrojtjen e punëtorëve nga temperaturat e larta, për periudhën 22 – 25 korrik 2025.
MSH u ka bërë thirrje gjitha institucioneve që t’i respektojnë rekomandimet.
“Temperaturat e larta ndikojnë negativisht në shëndetin e njeriut, veçanërisht tek grupet më të ndjeshme të shoqërisë, si: fëmijët, të moshuarit, gratë shtatzëna, personat me sëmundje kronike, si dhe punëtorët që punojnë në ambiente të hapura apo në kushte pune me temperatura të larta. Ftohen të gjitha institucionet që t’i respektojnë këto rekomandime, me qëllim të mbrojtjes së shëndetit të punëtorëve dhe të grupeve të tjera të ndjeshme”, thuhet në njoftimin e MSH-së.
Këto janë masat mbrojtëse që rekomandon MSH-ja:
Të shmanget puna në ambient të jashtëm prej orës 11:00-16:00;
Gratë shtatzëna të lirohen nga puna nga ora 11:00 deri në 16:00, nëse në vendin e punës nuk plotësohen kushtet sipas pikave 1.4, 1.5, dhe 1.6;
Personat me sëmundje kronike të punojnë me orar të shkurtuar, maksimumi 4 orë në ditë;
Të përshtaten oraret e punës për të punësuarit, në mëngjes herët ose pasdite vonë, përfshirë edhe mundësinë e punës nga shtëpia;
Të sigurohet ajrosja e mjaftueshme në vendet e punës të mbyllura;
Të vendosen pika freskimi (përdorimi i çadrave të lëvizshme dhe materialeve tjerapër të krijuar hije apo zona freskimi) në vend punishtet e hapura për freskim të punëtorëve dhe të sigurohet qasje në ujë te ftoftë për punëtorët;
Të shpërndahen informacione për mënrynë e mbrojtjes nga nxehtësia.
