Ministria e Shëndetësisë ka bërë të ditur se uji që kalon nëpër kanalin e Ibër-Lepencit është i papijshëm pas shpërthimit të premten mbrëma.
Nga ky kanal furnizohet me ujë Kompania Rajonale e Ujësjellësit “Mitrovica” dhe një pjesë e Prishtinës.
Në një njoftim në Facebook, MSH-ja ka thënë se sipas analizave të bëra ka dalë që uji nuk është për momentin i pastër për pije.
“Sipas analizave të para, të kryera në ujin e patrajtuar, uji që kalon nëpër kanalin e Ibër-Lepencit nuk është për momentin i pastër për pije, ndërkohë që përveç analizave mikrobiologjike dhe atyre bakteriologjike, IKSHPK/QRSHP Mitrovicë, do të analizojë edhe paramatra të tjerë që kanë të bëjnë me praninë e metaleve në ujë”, thuhet në njoftim.
IKSHPK-ja po bashkëpunon me KRU “Mitrovicën” dhe KRU “Prishtinën” për të monitoruar ujin nga kanali i Ibër-Lepencit dhe do t’i kryejnë të gjitha analizat e nevojshme për t’u siguruar që uji, para se të lejohet për pije, t’i përmbush parametrat e lejuar.
“Ministria e Shëndetësisë dhe IKSHPK sigurojnë qytetarët që janë duke u ndërmarrë të gjitha masat e nevojshme që uji që përdoret në zonat e prekura nga pasojat e shpërthimit t’i përmbushë standardet e lejuara”, thuhet ndër të tjera./teve1.info/
