Brenda muajit shtator, në Qeveri do të procedohet, dokumenti që në fokus ka trajtimin e fëmijëve viktimë të abuzimit.
Në kuadër të Ministrisë së Shëndetësisë, një udhëzim administrativ do ta rregullojë trajtimin mjekësor dhe psikologjik të fëmijëve të abuzuar, për t’i ndihmuar në rehabilitimin dhe ri integrimin në shoqëri.
Në të specifikohen përgjegjësitë individuale dhe institucionale, si dhe bashkërendimi mes tyre në procesin e trajtimit të të miturve.
Për këto trajtime, parashihet edhe një buxhet nga Qeveria e Kosovës.
Ndërkaq, sipas Ministrisë së Shëndetësisë, përfitues të këtyre trajtimeve, do të jenë të gjithë fëmijët viktimë të abuzimit, pa marrë parasysh shtetësinë, madje edhe ata pa shtetësi, azilkërkues e refugjatë.
“Abuzim i fëmijës, në kuptim të këtij udhëzimi administrativ përfshinë por nuk kufizohet në të gjitha format e dhunës ndaj fëmijës, neglizhimin e fëmijës, keqtrajtimin, prostitucionin me fëmijë, pornografinë me fëmijë, rrëmbimin e fëmijës, trafikimin e fëmijës, shfrytëzimin, abuzimin seksual të fëmijës”, thonë nga MSH.
Psikologu klinik, Naim Telaku, e ka konsideruar si të rëndësishme përfshirjen e shërbimeve psikologjike.
Por, ka numëruar disa mangësi në përmbajtje të Udhëzimit Administrativ.
Mungesa e psikologëve klinikë u theksua në rastin e dhunimit të 11-vjeçares, që si pasojë kishte vonimin në intervistimin e saj nga prokuroria.
Kronika e realizuar nga gazetarja Florijeta Dernjani.
