Me rastin e fillimit të Muajit të Ndërgjegjësimit Kundër Kancerit të Gjirit, Ministria e Shëndetësisë ka njoftuar se nga data 1 deri më 31 tetor do të vendoset Mamografi Mobil në disa qytete.
Sipas njoftimit, gjatë këtij muaji, Mamografi Mobil do të ketë në Fushë Kosovë, Drenas, Dragash, Mamushë, Novobërdë , Shtërpcë, Partesh, Ranillugë, Deçan, Junik, Suharekë, Mitrovicë të Veriut, Leposaviq, Zubin Potok, Zveçan, Kllokot dhe Han të Elezit, sipas datave të specifikuara, nga ora 10:00 deri në 16:00.
“Mamografia është metoda më e rëndësishme diagnostikuese për zbulimin e hershëm të kancerit të gjirit. Si një ekzaminim radiologjik, ajo mundëson identifikimin e ndryshimeve shumë të vogla në indin e gjirit, shpesh para se këto të jenë të dukshme klinikisht. Zbulimi i hershëm ka rëndësi thelbësore, pasi rrit ndjeshëm mundësinë e trajtimit efektiv dhe ul vdekshmërinë nga kjo sëmundje. Mamografia rekomandohet si mjet skriningu për gratë mbi 40 vjeç, ose më herët për ato me faktorë rreziku, duke qenë një procedurë të thjeshtë, të shpejtë dhe të sigurt për ruajtjen e shëndetit të grave. Bëj mamografinë, sepse zbulimi i hershëm shpëton jetë! Kontrollohu rregullisht”, theksohet në njoftim.
