Sot në njëvjetorin e luftës së Rusisë ndaj Ukrainës, Ministria e Punëve të Jashtme të Kosovës thotë se vendi i ka qëndruar afër shtetit ukrainas që nga dita e parë.
Përmes një postimi në Facebook, nga MPJD thonë se të gjitha vendet e civilizuara duhet të vendosin sanksione ndaj Rusisë për veprimet e saj, përcjell teve1.info
Sipas MPJD-së, Kosova e ka ndier vetë dhimbjen e Ukrainës.
“Ne vazhdojmë t’i mbështetim përpjekjet e Ukrainës që të mbrohet kundër agresionit rus. Populli i Kosovës e ka ndier dhimbjen e okupimit dhe ne qëndrojmë përkrah Ukrainës në luftën e saj për liri. Populli i Ukrainës meriton të jetojë në paqe, siguri dhe liri. Derisa i kujtojmë viktimat e luftës në Ukrainë, ne dënojmë fuqishëm shkeljen flagrante të së drejtës ndërkombëtare nga Rusia dhe agresionin e vazhdueshëm ndaj fqinjit të saj. Ata që e filluan këtë luftë, duhet të vihen para drejtësisë për krimet e kryera”, thuhet në njoftimin e tyre.
Sot bëhen një vit nga fillimi i agresionit ushtarak rus në Ukrainë.
Presidenti ukrainas, Volodymyr Zelenskyy ka deklaruar se Rusia është duke kryer gjenocid në Ukrainë, ndërsa ka apeluar vazhdimisht perëndimin që t’i dalë në ndihmë vendit të tij. Këto të fundit kanë ndihmuar Ukrainën financiarisht, me armatim dhe në forma të tjera. /Teve1.info/
