Ministria e Punëve të Jashtme të Kosovës i ka dërguar kërkesë Qeverisë së Serbisë për të marrë detaje lidhur me arrestimin e dy kosovarëve në kufi me shtetin serb.
Tëvë1 mëson se R.H. dhe G.A., janë arrestuar përderisa ishin duke prerë drunj në mal, afër kufirit me Serbinë.
MPDJ-ja për teve1.info thotë se kanë kërkuar identitetin e personave të arrestuar dhe lokacionin ku ata janë duke u mbajtur.
Ndërkohë, lidhur me këtë kërkesë enden nuk është përgjigjur Qeveria e Serbisë.
“Në lidhje me këtë rast, Zyra Ndërlidhëse e Republikës së Kosovës në Serbi i ka dërguar tashmë Qeverisë së Serbisë, përmes Zyrës Ndërlidhëse të Serbisë në Kosovë, një kërkesë formale për ta konfirmuar rastin, si dhe për të ofruar detajet tjera relevante, përfshirë identitetin e personave të arrestuar dhe lokacionin ku ata janë duke u mbajtur”, thonë nga MPJD-ja.
Lidhur me këtë rast janë njoftuar edhe Delegacioni i Bashkimit Evropian në Serbi dhe misionet diplomatike të vendeve të QUINT-it të akredituara në Beograd.
Nga kjo ministri konfirmojnë se në momentin e marrjes së përgjigjes diplomatët e Zyrës Ndërlidhëse të Republikës së Kosovës në Serbi do të bëjnë kërkesë zyrtare për vizitën e tyre në qendrën e paraburgimit ku ata janë duke u mbajtur.
Po ashtu në media serbe u raportua se ndaj dy kosovarëve, autoritetet serbe e kanë caktuar masën e ndalimit prej 30 ditësh./teve1.info/
