Ministria e Punëve të Jashtme dhe Diasporës ka njoftuar se të mërkurën Gjykata e Lartë e Suboticës ka vendosur vazhdimin e masës së paraburgimit edhe për 30 ditë të tjera ndaj ish-zyrtarit policor të Kosovës, Arbnor Sejdiu.
Në njoftim thuhet se përmes Zyrës Ndërlidhëse në Beograd, MPJD-ja është duke vazhduar përpjekjet intensive për trajtimin e drejtë dhe adresimin institucional të rastit të arrestimit të Spahiut nga autoritetet serbe.
“Spahiu ishte arrestuar më 7 qershor 2025 dhe ndaj tij u shqiptua masa fillestare e paraburgimit më 9 qershor. Prokuroria e Lartë e Suboticës ka iniciuar procedurë penale me pretendimet për përfshirje të z. Spahiu në rastin e Banjskës, megjithatë, sipas avokatit mbrojtës, deri më tani nuk është paraqitur asnjë provë apo dëshmi e besueshme që do të rëndonte pozitën e tij ligjore”, thuhet në njoftim.
Sipas MPJD-së, avokati i Sejdiut ka njoftuar se i ka dorëzuar gjykatës të gjitha dokumentet përkatëse të lëshuara nga institucionet e Republikës së Kosovës, përfshirë edhe dokumentacionet që dëshmojnë se ai e kishte lënë Policinë e Kosovës vite përpara ngjarjes së Banjskës.
“Përfaqësues të Zyrës Ndërlidhëse të Republikës së Kosovës në Serbi kanë komunikuar me familjarët e z. Spahiu, përkatësisht me bashkëshorten e tij, të cilën e kanë informuar për vendimin e fundit të gjykatës. Familjarët kanë bërë të ditur se nesër, më 10 korrik, do të udhëtojnë drejt Suboticës për ta vizituar z. Spahiu, ndërsa do të ndalen edhe në Beograd për një takim me përfaqësues të Zyrës”, theksohet në njoftim.
Tutje thuhet se duke marrë parasysh vendimin për vazhdimin e paraburgimit, Zyra Ndërlidhëse e Republikës së Kosovës në Serbi do të paraqesë kërkesë formale për lejimin e vizitës tek Spahiu, miratimi i të cilës pritet të bëhet brenda kësaj jave ose në fillim të javës së ardhshme.
“Zyra Ndërlidhëse e Republikës së Kosovës në Serbi mbetet në kontakt të rregullt me familjarët e z. Spahiu, duke i informuar në mënyrë transparente për të gjitha zhvillimet, veprimet institucionale dhe komunikimet me misionet diplomatike. MPJD rikonfirmon përkushtimin e saj që ky rast të trajtohet në mënyrë të drejtë dhe transparente, në përputhje me të drejtën ndërkombëtare dhe obligimet që rrjedhin nga dialogu i ndërmjetësuar nga Bashkimi Evropian. Për të gjitha zhvillimet e mëtejshme, do t’ju mbajmë të informuar”, thuhet në njoftimin e MPJD-së./teve1.info/
