Ministria e Punëve të Brendshme, në kuadër të periudhës informuese për zbatimin e Ligjit për të Huajt dhe Ligjit për Automjete, ka vënë në dispozicion të publikut një kanal të ri komunikimi për informim të shpejtë të qytetarëve, të huajve dhe vizitorëve.
Siç ka njoftuar MPB-ja, nga sot është funksionalizuar linja telefonike pa pagesë me numrin: 0800 46 757.
Përmes këtij numri, palët e interesuara mund të marrin informacione pa asnjë kosto lidhur me dispozitat e Ligjit për të Huajt dhe Ligjit për Automjete.
Linja pa pagesë ofron shërbime informative në tri gjuhë: shqip, serbisht dhe anglisht.
Sipas MPB-së, kjo linjë telefonike është pjesë e masave të planifikuara për ofrimin e informacioneve të nevojshme me qëllim të lehtësimit të qëndrimit të vizitorëve dhe të huajve në Republikën e Kosovës, si dhe për qarkullimin e automjeteve me targa të huaja.
Fushata informuese do të zgjasë deri më 15 mars 2026, me synim rritjen e qasjes në informata dhe sigurimin e respektimit të legjislacionit në fuqi. /teve1.info/
