Reperi i njohur kosovar, Gramoz Aliu, i njohur me emrin artistik Mozzik, ka reaguar ndaj raportimeve në media që pretendonin se ai ishte arrestuar mbrëmjen e kaluar në Aeroportin Ndërkombëtar të Prishtinës.
Përmes një postimi në rrjetet sociale, Mozzik konfirmoi se ka dhënë deklaratë në prani të avokatit të tij, Arianit Koci, në lidhje me një çështje që lidhet me një orë dore të markës luksoze Richard Mille, por mohoi kategorikisht se ka ndodhur ndonjë arrestim.
Reperi po ashtu hodhi poshtë raportimet që e lidhin emrin e tij me ndonjë borxh ndaj Administratës Tatimore të Kosovës (ATK), duke i cilësuar ato si të pavërteta dhe shpifje.
Në reagimin e tij, Mozzik shkroi:
“Sapo dhashë deklaratë, në prezencë të avokatit tim Arianit Koci, lidhur me çështjen e mbrëmjes së kaluar për orën e dorës Richard Mille në airoportin e Prishtinës. Mediat që kanë raportuar për një arrestim që nuk ka ndodhur, nuk kanë vepruar drejt. Po ashtu, raportimet për një kinse borxh ndaj ATK janë të pavërteta – vetëm rrena dhe shpifje. Sulme të tilla i përballoj me qetësi, njësoj si gripin – dhe nuk kanë asnjë peshë më shumë. Ju uroj suksese të gjithëve, dhe ishalla flini të qetë sonte. Ju dua edhe juve qe po shkruani keq !”
