Ëndrra që kishte me vite, iu realizua gjatë së premtes.
Naser Sekiraqa është një nga 15 oficerët e rinj që sot edhe zyrtarisht iu bashkua Forcës së Sigurisë së Kosovës.
23-vjeçari bartë emrin e axhës së tij i cili ra dëshmor në prillin e vitit 1999 në njërën nga betejat e mëdha në Zonën e Llapit.
Historia e këtij të fundit sipas Sekiraqës, është motivi kryesor që e shtyjti atë drejt Forcës së Sigurisë së Kosovës, për të veshur këtë uniformë me plotë krenari.
“Ditën kur është bë rivarrosja e agjës të ndjerit Naser Sekiraqa, dëshmor i kombit në atë ditë kam lind unë dhe gjyshi ma ka ripërtri emrin e tij, kur i kam kujtu senet nuk kam pas dyshim kam vazhdu e kam marrë vesh për QSU, ka qenë motivi me i madh, me pas emri im, familja, mënyra se si jemi rritë, e kaluara e popullit tonë dhe më pas nuk kam pasë mëdyshje për me vazhdu karrierën time”, u shpreh Sekiraqa.
Ndërkohë, babai i tij nën emocione tregon momentin kur 23 vjeqari u tregoi per vendimin drejtë FSK-së.
Në këtë ceremoni diplomimi, në mesin e pesëmbëdhjetë oficerëve të rinj për angazhimin e tij pas 4 vitesh studime, u shpërblye me diplomë e emblemë edhe i riu Arijanit Hoxha.
“Ne gjithëmonë do të kemi në mendje sakrificat e dëshmorëve … të betuar të zotuar dhe të përkushtuar do të përpiqemi së bashku të punojmë për të i ofruar vendit paqe, siguri dhe harmoni… Cmimi është dicka që simbolizon një rezultat, pa ndihmën e shokëve të mi që i kam pasë gjithëmonë krah vetës për vite me radhë nuk kisha arritë në këtë rezultat… Këtë cmim ia dedikoj së pari familjes dhe gjithë dëshmorëve të rënë për lirinë e atdheut…”, tha oficeri Arijanit Hoxha.
E nga 15 oficerët e rinj, për këtë gjeneratë u diplomua edhe një oficere e vetme, e cila suksesin ua dedikon familjarëve të saj dëshmor.
“Është një ditë edhe më emocionuse për neve sidomos kur familjarët tanë e kanë jep jeten që ne sot me vesh këtë uniform dhe jam shumë krenare. Këtë diplomim ia dedikoj agjallarëve të mi dëshmorë” deklaroi ajo.
Pas diplomimit, oficerët e rinj u betuan për misionin e tyre, dhe më pas në përfundim të ceremonisë filluan urimet me njëri tjetrin dhe familjarët e tyre.
