Instituti Hidrometeorologjik i Kosovës (IHMK) ka njoftuar se nga dita e enjte vendi do të përfshihet nga një ndryshim i theksuar i motit, me rënie të ndjeshme të temperaturave dhe paraqitje të reshjeve të borës, sidomos në zonat malore.
Sipas IHMK-së, nga e enjtja deri të shtunën do të depërtojë në territor masa e ftohtë ajrore me origjinë veriore, e cila do të sjellë një regjim termik tipik dimëror dhe kushte për mot të vranët e me reshje.
“Në zonat malore priten reshje të vazhdueshme bore, ndërsa në ultësira reshjet fillimisht do të paraqiten në formë të rigave të dobëta shiu, të cilat me rënien progresive të temperaturave do të shndërrohen gradualisht në reshje bore”, thuhet në njoftimin e institutit.
Në disa zona të ultësirave, gjatë orëve të pasdites dhe mbrëmjes së së enjtes dhe të premtes, mund të ketë intervale të shkurtra me borë, varësisht nga intensiteti i masës së ftohtë dhe profili termik i shtresave të ulëta të atmosferës.
Sa i përket vlerave temperaturale, IHMK bën të ditur se të enjten temperaturat minimale do të jenë ndërmjet 1 dhe 3 gradë Celsius, ndërsa maksimalet parashihen të lëvizin nga 4 deri në 6 gradë. Të premten pritet një situatë e ngjashme, me minimale nga 1 deri në 2 gradë dhe maksimale nga 4 deri në 6 gradë Celsius.
Instituti apelon qytetarët që të kenë kujdes gjatë qarkullimit, sidomos në zonat malore ku priten reshje më intensive bore dhe mundësi të krijimit të vështirësive në komunikacion.
