Presidentja e vendit, Vjosa Osmani, nuk ka dekretuar Blerim Isufajn, për kryeprokuror të shtetit.
Lidhur me këtë rast, avokati, Ardian Bajraktari, vlerësoi që Gjykata Kushtetuese mund ta kontestojë këtë vendim të presidentes.
Megjithatë, Bajraktari tha se procedurat gjyqësore do të japin përgjigje në qoftë se ky vendim është i drejtë, shkruan teve1.info.
“Nga ajo që u pa deri tash, rasti do të shkojë në Gjykatën Kushtetuese. Po, mund të ketë kontestim të vendimit nga Gjykata. Palët e autorizuara kanë të drejtë ta kontestojnë një akt të presidentes për të parë se a ka shkelje serioze të Kushtetutës. Mirëpo, Gjykata Kushtetuese do të jetë e para që vendosë nëse ka shkelje. Në bindjen time, kanë qenë pa bazë kushtetuese dhe ligjore, arsyetimet e zyrës së Presidentes dhe vetë presidentes, për pritje të deritashme, për faktin se në deklarime publike kanë thënë se po presin epilogun e Gjykatës Kushtetuese. Ndërsa, nuk ka bazë kushtetuese dhe ligjore fakti që një proces i tillë duhet të presë kaq gjatë. Pra, se a do të ketë involvim direkt të presidentes së Kosovës në raste të tilla, besoj që do të jetë një test për Gjykatën Kushtetuese”, deklaroi Bajraktari në emisionin “Ditari”.
I pyetur se çka mund të pritet nga një vendim i Kushtetueses nëse arrin çështja deri atje, ky i fundit tha se presidentja nuk mund të ketë rol direkt në procesin e përzgjedhjeve të tilla.
“Si rregull, presidentja nuk mund të ketë rol direkt në procesin e përzgjedhjeve të tilla. Por, duhet të presim se si do të arrijnë të njëjtat të argumentohen dhe kundër argumentohen nga palët tjera të përfshira në këtë proces para Gjykatës Kushtetuese”, potencoi tutje Bajraktari në Tëvë1.
Kujtojmë që Osmani sot tha se ka njoftuar Këshillin Prokurorial të Kosovës, se duke u bazuar në shkeljet që janë evidentuar në proces, nuk mund ta dekretojë Isufajn, për Kryeprokuror të Shtetit./teve1.info/.