Janë armët që ishin në duar të qytetarëve, ilegalisht.
E këto 763 armë të vogla dhe të lehta u shkatërruan të premten në një hekurishte në fshatin Prelez të Ferizajt.
Drejtori i Policisë, Gazmend Hoxha tha se ky proces bëhet me qëllim për të ofruar sa më shumë siguri për qytetarët.
Teksa shtoi në shumicën e rasteve armët ilegale janë përdorur në raste kriminale.
“Shumë jetë janë humbur për shkak të përdorimit të armëve ilegale po ashtu incidente tjera që ndërlidhen me armë andaj iu bëjmë thirrje gjithë qytetarëve tonë që të qëndrojnë larg armëve ilegale, ata që janë pasionantë të armëve, MPB dhe Qeveria ka rregulluar kuadrin ligjor, të shkojnë të aplikojnë për licencim për marrje të armës dhe pastaj në poligonet e licencuara t’i shfrytëzojnë ato”, drejtori i Përgjithshëm i Policisë, Gazmend Hoxha.
E sipas përfaqësuesit të përhershëm të UNDP-së, Nuno Queiros të cilët kanë mundësuar këtë proces, shkatërrimi i këtyre armëve është promovim i një shoqërie paqësore e gjithëpërfshirëse.
“Vetëm gjatë kohës që kemi qenë këtu, janë kryer dy akte dhune me armë, pa llogaritur luftërat dhe situata të tjera. Kjo tregon se armët e vogla dhe të lehta të paligjshme shkaktojnë pasiguri, dëmtojnë civilët, minojnë institucionet dhe shpesh përdoren në dhunë bazuar në gjini dhe dhunë në familje. Policia, Ministria e Punëve të Brendshme dhe autoritetet e tjera relevante kanë treguar një angazhim të jashtëzakonshëm për të luftuar trafikun e paligjshëm, posedimin dhe keqpërdorimin e armëve. Por mund të jeni të sigurt se ne, si UNDP, dhe ekipi im i pranishëm sot, do të vazhdojmë t’ju mbështesim dhe jemi shumë krenarë që jemi partneri juaj i besuar në këto përpjekje”, deklaroi Queiros.
E para se të nisë shkatërrimi i tyre, u tregua se çka do të ndodhë me pjesët e armëve.
“Policia e Kosovës për me ngritë sigurinë për gjithë, ka menduar me i shkatërruar këto armë të cilat janë të liruar me vendim të Gjykatës për shkatërrim ndërsa nga materiali, ku do të shkrihen këto armë do të prodhohen kapak të pusetave që do të jenë për të mirën e përgjithshme”, tha Mentor Cakolli nga UNDP.
Kështu nisën të mledhen këto armë, por fillimisht ato u peshuan për sasinë e tyre.
Më pas, filloi edhe shkatërrimi i tyre, ku për së afërmi i pa edhe drejtori i Policisë, Hoxha.
Nga viti 1999 deri më tani, janë konfiskuar mbi 36 mijë armë ilegale, ku nga viti 2005 deri tani janë shkatërruar rreth 16 mijë armë të gjata dhe të shkurta.
