Sulmuesi Alvaro Morata beson se Spanja do të avancoj nga faza e grupeve në Kampionatin Evropian që nis të premten në Gjermani.
Spanja është pjesë e Grupit B, të cilin e përbëjnë edhe Kroacia, Italia e Shqipëria, ndërsa dy ekipet e para do të kalojnë raundin e grupeve.
Morata ka vlerësuar të gjithë kundërshtarët në grup, ndërsa edhe për Shqipërinë ka pasur fjalë të mëdha.
Sulmuesi i Atletico Madridit ka thënë se e njeh Italinë e Kroacinë, ndërsa ka shtuar se edhe Shqipëria ka ekip cilësor dhe Spanja aspak nuk do ta ketë lehtë përballjen me të gjithë kundërshtarët.
Ndeshjen e parë në “Euro 2024”, Spanja e luan me Kroacinë më 15 qershor për të vazhduar me Italinë më 19 qershor dhe më 24 qershor luan ndeshjen e fundit ndaj Shqipërisë.
“Ne kemi ekip të mirë dhe mund të përballemi me secilin kundërshtar. Nuk jemi favorit në grup për shkak se edhe ekipet tjera janë të mira. Kroacinë e Italinë e njohim pasi jemi përballur me ta, ndërsa edhe Shqipëria ka ekip shumë të fortë. Duhet të bëjmë paraqitje të mira për të avancuar nga grupi”, ka thënë Morata për “Gazzetta dello Sport”.
