Legjislatura e 8 e Kuvendit të Kosovës, ishte e para që pas përfundimit të luftës në Kosovë, kishte shumicën parlamentare. Në përfundim të saj, monitoruesit e punimeve në kuvend, thonë se legjislativi nuk ishte sa duhet produktiv dhe se u karakterizua me mungesën e kuorumit, bojkotimin e seancave nga deputetët e mazhorancës si dhe me papërgjeshmerine e ekzekutivit karshi deputetëve.
Opozita thirri edhe një seancë të jashtëzakonshme të enjten.
Kjo e fundit kishte të bënte për gjendjen në Korporatën Energjetike të Kosovës.
Por, përsëri në sallën plenare u pa një numër i vogël i deputetëve.
Kjo pasi partia në pushtet, vendosi që edhe një herë t’i bojkotoj seancat e thirrura nga opozita.
Në këtë formë, legjislatura e 8 po shkon në përfundimin e saj.
Kritika për punën e institucionit legjislativ kanë monitoruesit e punimeve në kuvend.
“Duke e pasur parasysh faktin që partia në pushtet e ka shumicën në kuvend, gjithë kanë pritur që kjo legjislaturë të jetë ndër më të suksesshme, mirëpo realiteti ka folur krejt ndryshe më këtë çështje. Kjo për shkak se Kuvendi i Kosovës në këtë legjislaturë është përballur me probleme të ndryshme, problemi kryesor ka qenë mungesa e kuorumit dhe mungesa e transparencës dhe llogaridhënies së qeverisë ndaj deputetëve”, thotë Melosh Gashi, hulumtues nga IKD.
Ai ka theksuar edhe sjelljen e ekzekutivi karshi të zgjedhurve të popullit.
Kryeministri i Republikës së Kosovës, kemi pas rastin kur ka refuzuar t’u përgjigjet pyetjeve parlamentare që është një instrument jashtëzakonisht i rëndësishëm dhe jetik për funksionimin e mirëfilltë të Kuvendit të Kosovës. Kryeministri i ka kushtëzuar përgjigjet në pyetjet parlamentare me votimin e marrëveshjeve ndërkombëtare, ka thënë Gashi.
Se kuvendi nuk e kishte përformancën e pritur në këtë legjislaturë, e thonë edhe në Institutin Demokratik të Kosovës.
“Sa i përket funksionit legjislativ, ne vlerësojmë që Kuvendi nuk ka realizuar pritshmëri e përmbushjes së agjendës legjislative, sepse ka dështuar të miratoj një numër të madh të ligjeve që kanë qenë pjesë e agjendës legjislative. Së dyti, seancat e kuvendit në të shumtën e rasteve janë të bojkotuara jo vetëm nga opozita por edhe nga vet mazhoranca. Tani jemi pothuajse në fund të mandatit 4 vjecar dhe kuvendi ende nuk ka përfunduar pikat e rendit të ditës, madje edhe ato që ishin në sesionin e kaluar”, Vullnet Bugaqku – hulumtues në KDI.
Ndryshe, kjo është legjislatura e 8 që nga përfundimi i luftës në Kosovë.
Ndërsa e para që partia në pushtet, ka shumicën parlamentare.
