Presidenti francez Emmanuel Macron njoftoi të martën se “Mona Lisa” do të ketë dhomën e saj të dedikuar brenda muzeut të Luvrit pas një renovimi dhe zgjerimi të madh të monumentit të Parisit që do të zgjasë deri në një dekadë.
Projekti i renovimit, i quajtur “Rilindja e Re e Luvrit”, do të përfshijë një hyrje të re të gjerë pranë lumit Seine, që do të hapet deri në vitin 2031, tha Macron në një fjalim nga dhoma ku shfaqet kryevepra e Leonardo da Vinçit.
Macron nuk bëri të ditur një shumë të saktë të buxhetuar për projektin për modernizimin e muzeut më të vizituar në botë, i cili është i rrënuar nga mbipopullimi dhe objektet e vjetruara. Por vlerësohet të arrijë deri në 800 milionë euro, raporton AP.
Riparimi i fundit i Luvrit daton në vitet 1980, kur u zbulua piramida ikonë e xhamit.
Macron tha se zgjerimi i muzeut do të lejojë që “Mona Lisa” të zhvendoset në një dhomë të re, të dedikuar dhe të qasshme për vizitorët përmes një bilete të veçantë. Kjo do ta bëjë vizitën më të thjeshtë për ata që duan të shohin pikturën dhe do të lehtësojë përvojën e vizitorëve të tjerë në pjesën tjetër të muzeut, tha ai.
“Kushtet e shfaqjes, shpjegimit dhe prezantimit do të jenë në përputhje me atë që meriton ‘Mona Lisa’,” tha ai.
Renovimi i madh i muzeut në vitet 1980 ishte projektuar për të pritur 4 milionë vizitorë në vit.
Vitin e kaluar, Luvri priti 8.7 milionë vizitorë.
Macron tha se një hyrje e re për Luvrin do të krijohet pranë Seine deri në vitin 2031, që do të financohet nga shitja e biletave, patronazhi dhe paratë e licencimit nga dega e muzeut në Abu Dhabi.
Macron tha se çmimet e biletave do të rriteshin për vizitorët e huaj nga jashtë Bashkimit Evropian, nga 22 euro (23 dollarë) tani. Ai premtoi se muzeu do të ishte më i sigurt dhe më komod si për publikun ashtu edhe për punonjësit.
