Nga BE nuk e kanë zakon të përmendin data konkrete për anëtarësimin e shteteve të reja në familjen evropiane.
Por ditë më parë Presidenti i Këshillit Evropian, Charles Michel, bëri thirrje që viti 2030 të caktohet si afati deri kur Bashkimi Evropian dhe vendet kandidate të jenë të gatshëm për zgjerim.
Kjo deklaratë e Presidentit të Këshillit Evropian nxiti reagime të mëdha në opinionin publik.
E njohësi i çështjeve politike nga Austria, Gunther Fehlinger, tregon arsyet që po e shtyjnë BE-në të bëjë ndryshime në këtë drejtim.
“Është një sinjal i mire që Presidenti i Këshillit Evropian, Charles Michel e ka caktuar një datë, por megjithatë mendoj se integrimi i këtyre shteteve në bllokun evropian duhet të ndodhë më shpejtë. Agresioni ushtarak i Rusisë në Ukrainë ia ka hapur sytë Evropës prandaj dhe po shohim një dinamik të re nga Bashkimi Evropian. Ka ardhur koha që Evropa të jetë më e bashkuar se kurrë dhe kjo të ndodhë me anëtarësimin e plotë të vendeve të Ballkanit Perëndimor. Problemi i vetëm që shoh këtu është Serbia e cila është duke shkuar në një drejtim tjetër. Serbia akoma nuk i ka vënë sanksione Rusisë dhe nuk ka gatishmëri që t’i normalizoj raportet me Kosovën”, tha ai për Tëvë 1.
Edhe profesori nga Oxford University, Richard Caplan, vlerëson se është duke u krijuar një momentum i ri brenda unionit evropian.
Megjithëse ai thotë se ka ende shumë sfida për BE-në derisa të marrë një vendim përfundimtar për zgjerim.
“Momenti po ndërtohet për një raund të ri zgjerimi që do të përfshijë Ballkanin Perëndimor. Kjo pasqyrohet në fjalimin që presidenti i Këshillit Evropian Charles Michel mbajti në Bled. Megjithatë gjatë kësaj periudhe brenda Bashkimit Evropian duhet të bëhen reforma dhe Franca dhe Gjermania janë duke punuar drejt reformës së procedurave të vendimmarrjes përpara se të pranojnë anëtarë të rinj. Unë pres që do të duhet të ketë edhe disa diskutime të vështira për reformën buxhetore. Aderimi i anëtarëve të rinj, më të varfër do të kërkojë rregullime buxhetore që jo të gjithë anëtarët do t’i mirëpresin”, tha Caplan për Tëvë 1.
Kroacia është vendi i fundit që iu bashkua Bashkimit Evropian në vitin 2013.
