Molliqaj para protestueseve tha se edhe 23 vite pas çlirimit të Kosovës, sipas tij çlirimi po ka kosto, raporton Teve1.info
“Lufta për liri është shenja që ky është shteti jonë. Damkosja e kësaj luftë është sulmi mbi Kosovën e pavarur. Edhe 23 vite pas çlirimit të Kosovës, çlirimi po ka kosto, ne që s’kemi pasur mundësinë ta ndjemë peshën e lirisë sot mund ta mësojmë atë. Shikojeni gjykimin e ushtarëve në Hagë se kjo tregon se liria është sakrificë. Shikoni dënimin arbitrar të Mustafës, shikoni aktgjykimin e kësaj gjykate ku thotë se duhet të dënohet, komandat “Cali” edhe nëse viktima është vrarë nga plumbat e ushtrisë serbe. Kjo është e pritshme kur gjykata nuk e ka qëllim drejtësinë por dënimin e UÇK-së”, ka thënë ai.
Sipas tij, ata që e kanë kundërshtuar këtë Gjykatë, e kanë obligim të luftojnë më shumë se atëherë.
“Ne nuk jemi këtu as me i detyru ata të cilët e kanë kundërshtuar këtë Gjykatë e as me i fajësu ata që e kanë votuar këtë. Ata që e kanë kundërshtuar këtë gjykatë nëse e kanë pasur përnjëmend e kanë më shumë detyrë dhe obligim sot me luftu më shumë se atëherë. Ndërsa ata që e votuan këtë gjykatë nën presionin e akuzës për trafikim organesh sot e kanë të drejtën legjitime ta kundërshtojnë. Në anën tjetër me votën e tyre është krijuar një monstrum i cili nuk e ka synim drejtësinë, por përndjekjen e UÇK-së. Ftesa jonë është e qartë në emër të gjithë juve që jeni këtu që duhet të bëhemi bashkë nëse e kemi përnjëmend mbrojtjen e UÇK-së”, deklaroi ai.
Ai ka një thirrje për ndërkombëtarët.
“Secili ndërkombëtarë duhet ta dijë se thirrja në mbrojtje të UÇK është thirrje për drejtësi. Drejtësia gjykon krimet dhe jo përkatësi kombëtare. Nëse duan drejtësi jemi të hapur, përndjekje politike për UÇK-në nuk do të lejojmë”, tha Molliqaj. /Teve1.info/