Kryetari i Partisë Socialdemokrate (PSD), Dardan Molliqaj ka reaguar pas takimit të sotëm ndërmejt kryeministrit të Kosovës, Albin Kurti me presidentin e Serbisë, Aleksandar Vuçiq.
Molliqaj ka thënë se Kurti është dorëzuar dhe se e ka panuar marrëveshjen.
“Albin Kurti u dorëzua. E pranoi marrëveshjen. Borell e konfirmoi këtë zyrtarisht e publikisht. Ambasadori i Kosovës lëshoi FAKE NEËS përmes mediumit ku ka punuar, në funksion të propagandës së pushtetit. E Kosova zyrtarisht mori obligim ligjor, sonte, me dakordimin e Albin Kurtit, që të pranojë një marrëveshje të dëmshme që Asociacionin e ka në qendër. Ditët në vijim vazhdojnë negociatat për datat e zbatimit të Asociacionit dhe marrëveshjeve të tjera. Por ditëve në vijim do të vazhdojë rezistenca qytetare kundër kësaj marrëveshjeje. Dorëzimi i Albin Kurtit nuk do të jetë edhe dorëzim i Kosovës!”, ka shkruar Molliqaj.
Shefi i diplomacisë evropiane, Josep Borrell ka thënë se Kurti e Vuçiq u morrën vesh që nuk ka nevojë për diskutime të tjera rreth propozimit evropian.
Megjithatë Borrell tha se duhen negociata tjera për t’i gjetur modalitetet e zbatimit të saj dhe për këtë do të ketë takim tjetër në mars.
“Kisha kënaqësinë të pres presidentin Vuçiq dhe kryeministrin Kurti për takimin e parë të nivelit të lartë këtë vit. Fokusi ishte diskutimi për propozimin evropian për normalizimin e marrëdhëneive mes Kosovës dhe Serbisë. Është zhvillim signifikant sepse që nga vera kemi qenë të përfshirë vetëm në menaxhimin e krizave. Një krizë pas tjetrës. Ky propozim që e kemi diskutuar sot, është përkrahur nga 27 shtetet e Këshillit të Evropës. Fillimisht iu prezantua palëve shtatorin e kaluar dhe që nga atëherë, Lajçak ka flutuar në rajon, 10 herë në Prishtinë dhe 8 herë në Beograd. Për herë të parë u diskutua në një takim për këtë propozim sot”, tha Borrel.
“Presidenti Vuçiq dhe kryeministri Kurti janë marrë vesh sot që nuk ka nevojë për diskutime tjerë për propozimin evropian. Pasi që ata u dakorduan që nuk ka nevojë për diskutime tjera, teksti do të publikohet shpejt në webfaqen e EEAS. Ky propozim është për qytetarët e Kosovës dhe Serbisë. Marrëveshja do të ofrojë mundësi të reja ekonomike dhe investime të reja në Kosovë dhe Serbi. Kishte gatishmëri për ta implementuar marrëveshjen por duhen ende negociata për modalitetet. Shuttle diplomacia do të vazhdojë dhe do të kemi takim tjetër në mars për t’i finalizuar diskutimet“, shtoi Borrell.
