Kryetari i PSD-së, Dardan Molliqaj, ka reaguar ndaj vendimit të Këshillit të Bashkimit Evropian për heqjen e regjimit të vizave për qytetarët e Kosovës që posedojnë pasaporta të lëshuara nga Drejtoria Koordinuese e Serbisë.
Sipas tij, ky vendim është paralajmërim i rrezikut.
Tutje Molliqaj, ka thënë se BE-ja sheh Kosovën zyrtare si të barazvlefshme me entitetin ilegal, autonom të Serbisë në Kosovë, teksa shtoi se ky paralelizëm është simptomë serioze e Asocacionit në ardhje.
“Vendimi i Këshillit të Bashkimit Evropian për heqjen e regjimit të vizave qytetarëve të Kosovës që posedojnë pasaporta ilegale, të lëshuara nga Drejtoria Koordinuese e Serbisë, është paralajmërim i rrezikut. Sovranitetit i brendshëm është duke shërbyer vetëm si material përdorimi populist, në ndërkohë që BE sheh Kosovën zyrtare si të barazvlefshme me entitetin illegal, autonom të Serbisë në Kosovë. Për më tepër, ky paralelizëm është simptomë serioze e Asociacionit në ardhje”, ka thënë Molliqaj.
“Kjo është dëshmi që brenda projektit dialogues me Asociacionin në të, ti vetëm sa ke avancuar drejt tij. Ato kushtet e pafund, qesharake, kanë shërbyer në këmbim/mungesë të pozicionit të ri në dialog”shtoi ai.
Tutje i pari i PSD-së, theksoi se përgjegjësia kryesore i takon Qeverisë së Kosovës.
“Përgjegjësia kryesore për këtë pësim i takon Qeverisë së Kosovës. Nën mandatin e saj kishe obligim që të siguronte mirëqenie për të gjithë qytetarët pa dallim, por ja që e thelloi dallimin edhe më, si në përfaqësim politik ashtu edhe në atë ekonomik e social”, deklaroi Molliqaj.
Molliqaj tha se liria e lëvizjes i takon të gjithë qytetarëve, por që qytetarët nuk guxojnë t’i vuajnë politikat populiste për shkak të etnisë që kanë.
“Liria e lëvizjes i takon secilit qytetarë dhe ky duhet të jetë parim që qeverisë me jetën tonë. Tutje, qytetarët nuk guxojnë t’i vuajnë politikat populiste për shkak të etnisë që kanë. Çëshjta që po diskutojmë këtu është pikërisht lagimi përherë e më shumë prej mundësisë për paqe.Paralelizmat e tilla, në kuptimin legal, formalizojnë Asociacionin, para kurorëzimit të tij final”, ka shkruar Molliqaj në Facebook.
Ndryshe, sot Këshilli i Bashkimit Evropian ka vendosur në favor të heqjes së regjimit të vizave për qytetarët serb të Kosovës, të cilët posedojnë pasaporta të Serbisë.
Në komunikatën e bërë për media thuhet se vendimi është marrë në takimin e ministrave të jashtëm të BE-së./teve1.info
Qeveria për heqjen e vizave për serbët e Kosovës: Nuk u konsultuan me ne, dëmtuan përpjekjet tona