Ishte në krye të grupit terrorist që vrau një rreshter policor në Banjskë të Zveçanit vitin e kaluar.
Ish-nënkryetari i Listës Serbe, Milan Radoiçiq bashkë me anëtarë tjerë të grupit ikën maleve drejt Serbisë.
Që nga ajo kohë, ai ka gjetur strehim në shtetin serb, ndaj të cilit edhe është lëshuar fletarrest nga INTERPOL-i.
Por, kishte aludime se i njëjti ka hyrë disa herë në territorin e Kosovës, në pjesën veriore të vendit.
Anëtari i Komisionit parlamentar për Siguri, Enver Dugolli thotë se nuk bëhet fjalë për një gjë të tillë, dhe se organet e sigurisë janë vigjilente në atë pjesë.
“Nuk kemi asnjë raport nga institucionet tona të sigurisë për një spekulim të tillë. Radoiçiqi momentin që identifikohet vendndodhja e tij apo edhe që është i kapshëm për organet e shtetit ai do të arrestohet dhe do të sillet para drejtësisë. Pra nuk kemi asnjë informacion që ai ka kaluar këndej kufirin sepse po ta kishim këtë informacion ai do të ishte edhe i arrestuar”, shprehet Dugolli.
Deputeti nga partia në pushtet ka folur edhe për raportet ndërkombëtare ku thuhet se KFOR ka negociuar me grupin terrorist për t’u lënë të lirë.
“Ne u besojmë raporteve zyrtare pra në këtë radhë i besojmë raportit zyrtar dhe reagimit që ka bërë KFOR-i për shkak se janë raporte të konfirmuara nuk lëshohemi në spekulime apo vlerësimet e raporteve tjera kushdo tjetër që dalin sepse mund të kenë qëllime të caktuara. Pra KFOR e demantoi një gjë të tillë dhe kategorikisht u shpreh se nuk ka pasur asnjë lloj negociimi me grupin e Radoiçiqit”, ka thënë ai.
E ish–ushtaraku vlerëson se një gjë e tillë edhe mund të ketë ndodhur për shkak se ende janë prezente grupe serbësh atje.
Derisa thotë se një sulm tjetër është i mundshëm për shkak se dhënia e urdhrave vije nga Beogradi.
“Mosprania e tij në Kosovë nuk dmth aspak që atje nuk ka banda kriminale të cilat edhe më tutje rrinë të gatshme për të vepruar dhe nuk e përjashton mundësinë që të kemi edhe një situatë tjetër ku një akt terrorist mund të kërcënojë prapë sigurinë e Kosovës në veri pa marrë parasysh edhe shtimin e numrit të forcave të KFOR-it dhe rritjen e numrit të policëve të Kosovës”, ka thënë ai.
Aktualisht Policia e Kosovës bashkë me KFOR-in e kanë nën vëzhgim gjithë pjesën veriore ku në çdo vend ka patrulla policore.
