Ylli i Liverpoolit, Mohamed Salah, ka shprehur dhimbjen e tij të thellë pas lajmit tragjik për vdekjen e bashkëlojtarit të tij, Diogo Jota, dhe vëllait të tij, Andre. Në një reagim emocional, ai theksoi se do ta ketë shumë të vështirë të kthehet në Liverpool pa Diogon.
Reagimi i plotë i Mohamed Salah:
“Kam mbetur pa fjalë, me të vërtetë. Deri dje, nuk e mendoja kurrë se do të kishte diçka që do të më frikësonte nga rikthimi në Liverpool pas pushimeve. Shokët e skuadrës vijnë dhe ikin, por jo në këtë mënyrë. Do të jetë jashtëzakonisht e vështirë të pranoj që Diogo nuk do të jetë aty kur të kthehemi. Mendimet e mia janë me gruan e tij, fëmijët e tij dhe, sigurisht, me prindërit e tij që humbën fëmijët papritur. Të afërmit e Diogos dhe vëllait të tij Andre kanë nevojë për gjithë mbështetjen që mund të marrin. Ata kurrë nuk do të harrohen.”
