Një mocion i mundshëm mosbesimi ndaj Presidentes së Komisionit Evropian, Ursula von der Leyen, është aktualisht në diskutim në Parlamentin Evropian, si pasojë e refuzimit të saj për të bërë publike mesazhet me tekst që shkëmbeu me drejtuesin ekzekutiv të kompanisë Pfizer gjatë pandemisë COVID-19.
Mocioni, i mbështetur nga mbi 70 eurodeputetë, synon të ngrejë çështjen e mungesës së transparencës në lidhje me negociatat për një kontratë shumë-miliardëshe për furnizimin me vaksina.
Në qendër të debatit janë mesazhet që von der Leyen thuhet se i ka dërguar CEO-së së Pfizer, Albert Bourla, në vitin 2021 – mesazhe që, pavarësisht kërkesave nga ligjvënësit dhe media, nuk janë bërë publike.
Eurodeputeti rumun, Gheorghe Piperea paralajmëron se “është hapur një Kuti e Pandorës”. Ai e cilëson të pazakontë faktin që një marrëveshje me vlerë rreth 35 miliardë euro është negociuar nëpërmjet SMS-ve dhe thekson se mungesa e transparencës cënon vetë themelet e demokracisë evropiane.
Në fillim të vitit 2025, Gjykata Evropiane e Drejtësisë vendosi në favor të një gazetari të New York Times, i cili kishte paditur Komisionin Evropian për të pasur akses në këto mesazhe. Sidoqoftë, sipas Piperea, Komisioni nuk ka zbatuar ende vendimin e gjykatës.
“Kur një gjykatë jep një vendim kundër teje, duhet ta respektosh. Nuk ke të drejtë ta injorosh,” tha ai.
Piperea kritikoi ashpër Komisionin Evropian për standarde të dyfishta në respektimin e sundimit të ligjit. Sipas tij, institucionet e BE-së janë shumë të rrepta me vendet e Evropës Lindore – si Rumania, Hungaria apo Polonia – por vetë shmangin llogaridhënien kur sfidohen.
“Kur BE-ja kritikon vendet e vogla për mungesë të sundimit të ligjit, është shumë e ashpër. Por kur vetë Komisioni shkel ligjin, askush nuk reagon,” u shpreh Piperea.
Mocioni i mosbesimit është aktualisht në shqyrtim nga Konferenca e Presidentëve, organi më i lartë drejtues politik në Parlamentin Evropian, i cili do të vendosë të mërkurën nëse mocioni mund të hyjë në rendin e ditës për seancën plenare të Strasburgut, të planifikuar për datat 7–10 korrik.
Për të kaluar, mocioni kërkon një shumicë prej dy të tretash të votave të hedhura si dhe një shumicë absolute të eurodeputetëve – çka e bën të vështirë miratimin e tij.
Megjithatë, Piperea thekson rëndësinë simbolike të kësaj nisme, pavarësisht rezultateve:
“Edhe nëse marr vetëm 30% apo 40% të votave, kjo do të jetë një shenjë. Një sinjal që transparenca nuk mund të anashkalohet.”
Ai gjithashtu pretendon se ndaj disa eurodeputetëve është ushtruar presion për të tërhequr firmën nga mocioni. “Njëri prej tyre, një anëtar i PPE-së, më i madhja parti në Parlament, është kërcënuar me përjashtim nëse nuk tërhiqet,” tha ai.
