Deputeti i Partisë Demokratike të Kosovës (PDK), Artan Behrami, ka komentuar aktgjykimin e fundit të Gjykatës Kushtetuese, i cili është publikuar i plotë gjatë ditës së djeshme. Në një intervistë në emisionin “Ditari” në Tëvë1, ai tha se ky vendim është në përputhje të plotë me Kushtetutën e Kosovës.
“Vendimi i Gjykatës Kushtetuese është në linjë me atë se çka thotë edhe Kushtetuta e Kosovës. Kushtetuesja bën thirrje për të gjetur zgjidhje, ndërsa VV-ja këto muaj që e ka bllokuar Kuvendin e Kosovës nuk është munduar ta zhbllokojë,” u shpreh Behrami.
Ai theksoi se qëllimi i Lëvizjes Vetëvendosje nuk është zgjidhja, por bllokada.
“Të gjithë qytetarët tashmë e kanë parë që qëllimi i VV-së është që gjithmonë të ketë diçka me hile. Prandaj, unë nuk pres që do të kemi një këndellje të VV-së që do ta pranojë vendimin e Gjykatës Kushtetuese. Unë besoj që loja e bllokadës do të vazhdojë edhe nesër në seancën e radhës,” tha ai.
Deputeti i PDK-së nënvizoi se partia e tij ka qenë që nga fillimi e gatshme për të gjetur një kompromis, duke ofruar edhe opsione konkrete për tejkalimin e situatës.
“PDK-ja që nga fillimi ka qenë shumë e qartë dhe ka ofruar zgjidhje. Ne ia kemi dhënë mundësinë që të konstituohet Kuvendi, që të ndërrohet kandidati. Ata tashmë janë të obliguar që të ndërrojnë kandidatin, sepse VV ka personalitete që mund ta marrin votën edhe nga opozita. Mirëpo Kurti nuk u beson atyre personave,” tha Behrami.
Ai shtoi se brenda VV-së ekzistojnë figura që nuk kanë mbështetje të mjaftueshme as nga partia e tyre.
“Prej një figure si Glauk Konjufca, ata zbresin në një shkallë përçarëse siç është Albulena Haxhiu, e cila ka persona që edhe brenda VV-së nuk e votojnë,” përfundoi ai.
