Me rastin e Ditës Ndërkombëtare të Tokës, Ministria e Mjedisit, Planifikimit Hapësinor dhe Infrastrukturës ka nënshkruar vendimin për themelimin e Task Forcës për të mbrojtur ambientin në vend. Ministri i MMPH, Liburn Aliu ka theksuar se ky veprim do të bëjë reduktimin e mbeturinave të plastikës.
“Sot kemi nënshkruar vendimin për themelimin e Task-Forcës së gjelbër, i cili është veprim i rëndësishëm lidhur me mbrojtjen e mjedisit në vendit tonë…Kjo Task- Forcë po krijohet si një strukturë e veçantë dhe e përkohshme në MMPHI dhe do të merret me përmirësimin e nivelit të mbrojtjes për lumenjtë, për reduktimin e mbeturinave të plastikës, përmirësimin dhe menaxhimin e parqeve kombëtare dhe ndërmarrjen e veprimeve kundër degradimit mjedisor. Kemi më se një muaj që përgatitemi për themelimin e kësaj Task-Force dhe sot pas nënshkrimit të këtij vendimi presim që brenda javës të mbajmë mbledhjen që do të miratohet edhe agjenda e veprimeve konkrete, e cila do të fillojë menjëherë. Muaji maj do jetë i ngjeshur me aktivitete në të cilat do të përfshihen inspektoratet e këtyre ministrive, Policia e Kosovës, dhe do të ndermirën masa konkrete kundër degradueseve gjithandej në vendin tonë”, tha Aliu.
Zëvendësministri i Mjedisit Jeton Raka ka bërë të ditur se kjo Task-Forcë do të mbrojë lumenjtë dhe parqet kombëtare dhe do të reduktojë mbetjet plastike.
“Objektivat e Task-Forcës do të jenë në mbrojtje të lumenjve, parqeve kombëtare dhe reduktimin e mbeturinave të plastikes, pra, ndalimin e gurëthyeseve ilegal, ndalimin e aktiviteteve ilegale në parqet kombëtare, veçanërisht në zonat strikte dhe intervenimi në këto zona, po ashtu, në zvogëlimin e mbeturinave të qeseve të plastikes do të shtojmë kontrollet dhe inspektimet tek prodhuesit e qeseve të plastikës, identifikimi e deponive ilegale dhe trajtimin e tyre në bashkëpunim me komunat përkatëse. “Me një fjalë do të kemi zero tolerancë ndaj gjithë atyre që degradojnë mjedisin”, tha Raka.
Në anën tjetër, drejtori i Policisë së Kosovës për Hetimin e Krimit të Organizuar dhe Krimeve të Rënda, Jasip Krasniqi, tha se krijimi i kësaj Task-Force është një mundësi shtesë për ngritjen e parandalimit dhe kontrollit në një nivel më të lartë në bashkëpunim me institucionet tjera
“Krijimin e Task-Forcës e shohim si një mundësi shtesë që me bashkëveprim me institucionet tjera ta ngrisim në nivel më të lartë parandalimin e këtyre fenomeneve që kanë të bëjnë me klimën mjedisore”, tha Krasniqi për KP.
Ndryshe, më 22 prill, në mbarë botën, dashamirëse të mjedisit organizohen një varg aktivitetesh për të mirën e mjedisit dhe njeriut, si aktivitete pastrimi, gjelbërimi, pyllëzimi, manifestime në formë protestash, ekspozita, koncerte, vizita, peticione, orë edukative me nxënës.
