Ministria e Mjedisit, Planifikimit Hapësinor dhe Infrastrukturës (MMPHI) ka bërë të ditur se mbrojtja e resurseve ujore mbetet një nga prioritetet e saj strategjike, duke paralajmëruar vazhdimin e aksioneve për lirimin e pronave ujore të uzurpuara dhe largimin e objekteve të ndërtuara pa leje.
Përmes një reagimi publik, ministria njoftoi se ka nisur trajtimin e kërkesave të institucioneve dhe ndërmarrjeve publike për lirimin e pronave ujore të uzurpuara ose të tjetërsuara në kundërshtim me ligjin.
“Për Ministrinë e Mjedisit dhe Planifikimit Hapësinor, mbrojtja e resurseve ujore përbën një prioritet strategjik kombëtar. Prandaj kemi nisur trajtimin e menjëhershëm të kërkesave për lirimin e të gjitha pronave ujore të uzurpuara apo të tjetërsuara jashtligjshëm”, thuhet në reagim.
Ministria theksoi se ky angazhim po zbatohet në të gjithë territorin e Kosovës, duke veçuar aksionin e fundit në zonën e Liqenit të Ujmanit. Sipas saj, me asistimin e Inspektoratit të MMPHI-së dhe Policisë së Kosovës janë rrënuar 16 objekte të ndërtuara pa leje në pronat ujore nën administrimin e N.P. “Ibër-Lepenci”.
Sipas ministrisë, të gjitha palët e përfshira në aksion janë njoftuar paraprakisht, në përputhje me procedurat ligjore.
Po ashtu, MMPHI bëri të ditur se aktualisht janë duke u shqyrtuar me prioritet rastet e uzurpimeve dhe ndërtimeve pa leje në zonat përreth Liqenit të Batllavës dhe Liqenit të Badovcit, të cilat janë burime kyçe të furnizimit me ujë të pijshëm për qytetarët.
“Inspektorati i MMPHI-së po vijon identifikimin e plotë të shkeljeve në këto zona dhe, sapo të përfundojë ky proces, do të ndërmerren masa të menjëhershme ligjore për rikthimin e këtyre hapësirave në funksion të interesit publik”, thuhet në reagim.
Ministria shtoi se Inspektorati po vazhdon monitorimin edhe në zonat e mbrojtura dhe parqet kombëtare, duke ritheksuar përkushtimin për zbatimin e ligjit dhe mbrojtjen e resurseve ujore e natyrore nga uzurpimet dhe ndërtimet e paligjshme.
