Ministria e Kulturës, Rinisë dhe Sportit ka nisur të ndërmarrë masat e nevojshme që “ Tophanja” në Çarshinë e madhe në Gjakovë të mbrohet nga rreziku i mëtejmë.
MKRS thotë se lidhur me incidentin që ka ndodhur dje nga zjarri janë marrë masa nga Policia e Kosovës, Qendra Rajonale e Trashëgimisë Kulturore në Gjakovë, ku të njëjtit kanë dalë në terren bashkë me zjarrfikësit.
“Sot, më datë 31.08.2023, është mbajtur takim i përbashkët me të gjithë përfaqësuesit e institucioneve vartëse të trashëgimisë kulturore të MKRS-së për të diskutuar ndërmarrjen e hapave për mbrojtje të monumentit. Janë një varg masash që autoritetet përkatëse janë dakorduar që të ndërmerren, si: zbatimi i masave emergjente, vlerësimi i dëmeve, procedimi i shpejtë për ndërhyrje dhe implementimi i punëve për konservimin, restaurimin dhe funksionalizimin e ndërtesës”, thuhet në njoftim.
Gjithashtu, është bërë e ditur se kjo ministri do të angazhohet me institucionet përgjegjëse që të identifikojë arsyet e zjarrit dhe të ndërmerren masat ligjore.
“Apelojmë tek qytetarët për respektim, vlerësim dhe kujdes të shtuar ndaj monumenteve të trashëgimisë kulturore si pasuri e përbashkët e shoqërisë”./teve1.info/
