Për rreth dy orë, Policia e Kosovës bllokoi rrugën “Shpëtim Robaj” në Taukbahqe e cila të çon për në Gërmi.
Kjo pasi diku rreth orës 10 e 30 minuta, ka pasur informacion se në një hapësirë të pa frekuentuar ndodhej një mjet shpërthyes.
Mobilizimi ishte i menjëhershëm dhe policia vendosi shiritat dhe bllokoi hyrje-daljet në të dyja anët.
Edhe ekipet e specializuara dolën në vend ngjarje.
Pas këqyrjes në vendngjarje dhe ekzaminimeve, policia largoi shiritat nga rruga.
Në fakt, sipas policisë ajo çfarë gjetën, nuk rezultoi fare me atë që morën informatën.
Mjeti i pashpërthyer doli të jetë pajisje e makinave.
“Pas ndërmarrjes së të gjitha veprimeve të nevojshme operative si dhe kontrollit të detajuar të hapësirës së caktuar nga ana e njësive të specializuara për menaxhimin me mjetet shpërthyese, ka rezultuar se mjeti nuk ka qenë shpërthyes. Bëhet fjalë për një pajisje të veturës”, thuhet nga policia.
Qytetarët dhe veturat vazhduan lëvizjen pas hapjes së këtij segmenti rrugor.
