Një rast i rëndë është raportuar mbrëmjen e së mërkurës në Pejë, ku persona të panjohur dyshohet se kanë vendosur një mjet shpërthyes dhe një letër me përmbajtje kërcënuese në derën e një objekti banimi.
Sipas raportit 24-orësh të Policisë së Kosovës, rasti ka ndodhur më 25 qershor, rreth orës 23:43.
Menjëherë pas pranimit të informacionit, njësitet policore kanë dalë në vendin e ngjarjes, ku kanë siguruar perimetrin për të shmangur çdo rrezik për banorët dhe kalimtarët.
Në vendngjarje ka intervenuar edhe njësia për deminim e Policisë së Kosovës, e cila ka larguar mjetin shpërthyes në mënyrë të sigurt.
“Raportohet se është vendosur një mjet shpërthyes dhe një letër me përmbajtje kërcënuese në derën e një objekti banimi. Është bërë sigurimi i vendit të ngjarjes, ndërsa njësia për deminim e Policisë së Kosovës ka bërë largimin e mjetit shpërthyes. Rasti është duke u hetuar”, thuhet në raportin e Policisë së Kosovës.
Policia nuk ka bërë të ditur nëse ka persona të dyshuar lidhur me rastin, ndërsa hetimet për zbardhjen e plotë të ngjarjes janë në vazhdim.
