Zëdhënësja e “KRU Prishtina”, Arjeta Mjeku ka thënë se vlerat e sasisë së manganit në Liqenin e Badocit ndryshojnë kohë pas kohë.
Sipas zëdhënëses, e rëndësishmja e kësaj është që KRU Prishtina ka filluar të shpërndaj ujë të pijshëm përmes autoboteve në Graqanicë dhe në rrugën “Muharrem Fejza” në Prishtinë.
“Situata e ujit në Liqenin e Badocit, vlerat e sasisë së manganit ndryshojnë kohë pas kohe, e rëndësishmja tashmë për tashmë është që para një ore ne kemi filluar të shpërndajmë ujë të pijshëm përmes autoboteve në Graqanicë dhe në rrugën “ Muharrem Fejza” në Prishtinë, për të vazhduar edhe me lagjet e tjera, sepse kemi qytetarë që nuk kanë mundësi ekonomike që të blejnë ujë të pijshëm dhe për përgatitjen e ushqimit. Kështu që autobotet do të jenë në të gjitha pikat aty ku furnizohen me ujë të pijshëm nga sistemi i Badocit”, ka thënë Mjeku.
Derisa, ajo tha se mangani nuk gjendet vetëm në ujë, por në ushqim dhe në ajër.
“Mangani është një metal i cili nuk gjendet vetëm në ujë, gjendet në ushqim, në ajër, por që është më e rëndësishme është që uji mund të kontrollohet sepse ne mund të shpërndajmë ujë dhe të rekomandohet që mos të përdoret për pije dhe për ushqim”, shtoi ajo.
Parashikim nga ujësjellësi se sa zgjatë kjo situatë që uji të bëhet i papijshëm, ajo tha se kjo situatë vjen nga natyra dhe nuk mund të parashikojnë se sa zgjatë.
Më tej, ajo deklaroi se profesionistët e laboratorit dhe Instituti i Shëndetit Publik të Kosovës janë duke e monitoruar gjendjen e krijuar, ku një numër i madh i konsumatorëve po e shfrytëzojnë autobotin.
Ndryshe, sipas zëdhënëses nëse ka ngritje të madhe të vlerës së manganit probleme mund të shkaktoj tek fëmijët e moshës 0-5 vjeç.
“Profesionistët e laboratorit tonë njëkohësisht me Institutin e Shëndetit Publik të Kosovës janë duke e monitoruar për së afërmi gjendjen e krijuar së fundmi, nuk është ndonjë vlerë e madhe e lartë e manganit sepse manganit i nevojitet…..ajo që mund të shkaktoj probleme nëse ka ngritje më të madhe është tek fëmijët e moshës 0 deri në 5 vjeç. Kemi informacion se një numër i madh i konsumatorëve po marrin ujë të pijshëm përmes autoboteve”, tha ajo./teve1.info/
