Hetuesit e Stacionit Policor Jugu në Mitrovicë kanë realizuar një bastisje në shtëpinë e një të dyshuari pas hetimeve të zgjeruara lidhur me një rast të dhunës në familje dhe dyshimeve për posedim të paligjshëm të armëve.
Sipas një njoftimi për media nga Policia e Kosovës, gjatë bastisjes janë gjetur dhe sekuestruar:Pesë armë të gjata, një pistoletë me katër karikatorë, 447 fishekë të kalibrave të ndryshëm.
“Pas intervistimit të të dyshuarit mashkull kosovar, me aktvendim të prokurorit, ndaj tij është caktuar masa e ndalimit policor prej 48 orësh,” thuhet në njoftim.
Njoftimi thekson se ndaj të dyshuarit janë iniciuar raste për veprat penale:
- ‘Mbajtje në pronësi, kontroll ose posedim i paautorizuar i armëve’, dhe
- ‘Dhunë në familje’.
Policia e Kosovës apelon te qytetarët që çdo rast të dhunës në familje ta raportojnë në mënyrë që të ndërhyhet në kohë dhe të merren masat e nevojshme ligjore.
