Ministria e Infrastrukturës dhe Transportit ka njoftuar se, në bashkëpunim me Komunën e Prishtinës, janë nënshkruar tri marrëveshje për realizimin e projekteve infrastrukturore në kryeqytet, me vlerë të përgjithshme prej 9 milionë eurosh.
Sipas ministrisë, një nga projektet që tashmë është duke u realizuar është vazhdimi i rrugës “Bajram Bahtiri”, me vlerë totale prej 2.9 milionë eurosh. Nga kjo shumë, 1.4 milionë euro financohen nga Ministria e Infrastrukturës dhe Transportit.
Në njoftim thuhet se tri projektet e dakorduara me Komunën e Prishtinës janë ndërlidhja e rrugës Kolovicë – Sofali, vazhdimi i rrugës “Bajram Bahtiri” me katër korsi dhe kyçja në rrethin e Lakrishtës.
Ministria bën të ditur se do të financojë 4.3 milionë euro, ose rreth 47 për qind të vlerës së përgjithshme të këtyre projekteve.
Sipas Ministrisë së Infrastrukturës dhe Transportit, investimet janë pjesë e angazhimit të Qeverisë së Kosovës për zhvillimin e infrastrukturës në të gjitha komunat, në partneritet me pushtetin lokal, me qëllim përmirësimin e qarkullimit dhe lehtësimin e jetës së qytetarëve.
